Jańadan balalar teatr trýppalary men stýdııalary ashylady

ASTANA. QazAqparat – Jańadan balalar teatr trýppalary men stýdııalary ashylady. Bul jaıynda elimizdiń Mádenı saıasatynyń tujyrymdamasyn tanystyrǵan Mádenıet jáne sport mınıstri Ashat Oralov málim etti, dep habarlaıdy QazAqparat tilshisi.

«Óskeleń urpaqty rýhanı-adamgershilikke tárbıeleý maqsatynda «Oqýshynyń mádenı normatıvi» mádenı-bilim berý jobasy jalǵasady. Oǵan kontsertter men kórmelerge barý, opera, balet jáne dramalyq spektaklderdi, qazaqstandyq jáne sheteldik kınofılmderdi, mýltfılmderdi kórý kiredi», - dep jazady mınıstr Telegram paraqshasynda.

Onyń atap ótýinshe, jan basyna qarjylandyrý aıasynda balalar men jasóspirimderdi shyǵarmashylyq úıirmelermen kezeń-kezeńimen qamtý jalǵasady.

«Shyǵarmashylyq úıirmelermen qatar jańadan balalar teatr trýppalary men stýdııalary ashylady. Sondaı-aq, balalardyń Qazaqstan teatrlary men mýzeılerine aı saıyn barýy úshin «Teatrdaǵy kún» jáne «Mýzeıdegi kún» jobalary iske asyrylady. Teatr sabaqtary óskeleń urpaqtyń shyǵarmashylyq daǵdylaryn damytýǵa kómektesedi. Sondaı-aq osy toptardaǵy balalarmen qatar erekshe qajettilikteri bar adamdardy da sahna ónerine baýlıtyn joba ázirlenip jatyr», - dedi Ashat Oralov.