Jańaarqada 15 kópbalaly otbasy qonys toıyn toılady

JAŃARQA. QazAqparat - Qaraǵandy oblysynyń Jańaarqa aýdanyndaǵy 15 kóp balaly otbasylarǵa menshikti turǵyn úı kiltteri tabys etildi. Olardy aýdan ákimi ıÝrjan Bekqojın jańa qonystarymen quttyqtady, dep habarlaıdy QazAqparat tilshisi.

«Bul úıler «Nurly jer» baǵdarlamasy aıasynda kópbalaly otbasylarǵa berildi. Olarǵa respýblıkalyq bıýdjetten ekinshi turǵyn úı satyp alýǵa qarjy bólindi. Osylaısha biz 15 kópbalaly otbasyn turǵyn úımen qamtamasyz ettik», - deıdi Jańaarqa aýdany ákiminiń orynbasary Baqytjan Muqanov.

Dınara Kishmaǵanbetovanyń otbasy 2011 jyldan bastap turǵyn úı kezeginde turyp, baspanasyn kútken.

«Biz óz úıimiz týraly kópten beri armandadyq. 7 bala tárbıelep otyrmyz, kúıeýim ǵana jumys isteıdi. Osyǵan deıin úı jaldap turyp keldik, qıyn boldy. Biraq munyń bári artta qaldy. Qazir biz óz úıimizge kóshtik. Ol bizge óte unaıdy – úlken, úsh bólmeli, barlyq jaǵdaı jasalǵan, jóndeýden ótken. Biz óte qýanyshtymyz, barlyǵyńyzǵa úlken rahmet», - deıdi kópbalaly ana Dınara Kishmaǵanbetova.

Jańaarqa aýdany – oblysta salynyp jatqan turǵyn úı sany boıynsha kósh bastap tur. Atasý aýylynda tutas shaǵyn aýdan salynýda. Munda jeti úı turǵyzylyp jatyr, onyń ekeýi jyl sońynda tapsyrylady. Taǵy bes úı 2020 jyly paıdalanýǵa beriledi. Búgingi tańda Jańaarqa aýdanynda 80-ge jýyq adam turǵyn úı kezeginde tur.