Jańaarqa aýdanynyń burynǵy ákimi jumyskerin uryp óltirdi degen kúdikke ilindi

<p>JEZQAZǴAN. KAZINFORM &ndash; Ulytaý oblysy Jańaarqa aýdanynyń burynǵy ákimi sharýa qojalyqtarynyń birinde qyzmet etken jumysshysyn uryp óltirdi. Er adam balalarynyń kózinshe mert bolǵan. Kúdikti ustaldy, dep habarlaıdy Kazinform tilshisi.</p>

Jańaarqa aýdanynyń eks-ákimi Sáken Ospanov aýdan fermalarynyń birindegi qosalqy sharýashylyqta jumys istegen adamdy uryp óltirdi. Marqumnyń aty-jóni Dmıtrıı Rıabtsev. Ol áıeli, eki balasymen birge sharýa qojalyǵynda jumys istegen. Jumys orny qolaısyz bolǵandyqtan ol jerden qashyp ketip, aýdan ortalyǵyndaǵy hostelda túnemekshi bolǵan.

Sáken Ospanov sol jerge baryp, janjal shyǵarǵan. Ázirge urys neden týyndaǵany belgisiz. Alaıda burynǵy ákim Dmıtrıı Rıabtsevti otbasynyń kózinshe uryp tastaǵan. Er adam alǵan jaraqattarynan kóz jumdy. Atalmysh fakti boıynsha qylmystyq is qozǵaldy.

— Adam ólimine ákep soqqan aýyr dene jaraqatyn keltirý faktisi boıynsha Ulytaý oblystyq polıtsııa departamenti qylmystyq is qozǵady jáne tergeý júrgizip jatyr. Polıtsııa qylmys jasady degen kúdikpen 65 jastaǵy jergilikti turǵyndy qamaýǵa aldy, — dep habarlady Ulytaý oblystyq polıtsııa departamentiniń baspasóz qyzmeti.

Alaıda, kúdikti qazirgi ýaqytta ýaqytsha ustaý ızolıatorynda jatpaǵany belgili boldy. Ulytaý oblysynyń PD túsindirgendeı, eks-ákimniń ózi medıtsınalyq kómekke muqtaj bolǵan eken.

— 29 qarashada ınfarkt pen kúdiktiniń densaýlyǵynyń nasharlaýyna baılanysty prokýratýranyń kelisimi boıynsha bultartpaý sharasy ózgertildi jáne ol dárigerlerdiń baqylaýymen medıtsınalyq mekemege aýystyryldy, — dep túsindirdi Polıtsııa departamenti.

Sondaı-aq, tártip saqshylary qylmystyq isti tergeý aıaqtalǵanyn jáne qazirgi ýaqytta isti sotqa joldaý úshin taraptardy qylmystyq is materıaldarymen tanystyrý júrgizilip jatqanyn habarlady.