Jańa jylda pırotehnıka qoldanǵan kezde qandaı qaýipsizdik talaptaryn saqtaý kerek

ÓSKEMEN. QazAqparat – Shyǵys Qazaqstan oblysynyń qutqarýshylary pırotehnıka qoldanǵan kezdegi qaýipsizdik sharalaryn túsindirdi, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, Jańa jyl merekesinde óńir boıynsha órt oqıǵalary jıileı túsedi.

Buǵan pırotehnıka qoldanǵan kezdegi qaýipsizdik sharalarynyń saqtalmaýy sebep bolyp jatady.

«Jańa jyldyń Bengal shamy jáne merekelik otshashýsyz ótpeıtini belgili. Alaıda pırotehnıkadan órt shyǵý qaýpi bar ekendigin umytpaý kerek. Tipti odan ot tutanyp qana emes, adamnyń jaraqat alýy da ábden múmkin. Petardalardy, Bengal shamy men túrli otshashýdy satyp alǵan kezde eń aldymen nege nazar aýdarý qajet? Áýeli ónimniń sertıfıkattalǵanyna kóz jetkizińiz. Sodan keıin pırotehnıkany paıdalaný erejelerimen tanysý kerek. Ony saqtaý merzimine nazar aýdarýdy umytpańyz. Eger ónim merzimi ótip ketse, pırotehnıkany eshqandaı jaǵdaıda qoldanýǵa bolmaıdy», – deıdi oblystyq TJD Memlekettik órt baqylaý basqarmasy bastyǵynyń orynbasary Rústem Sembaev.

Onyń aıtýynsha, qaptama bútin, jyrtylmaǵan bolýy tıis.

Pırotehnıkany jaqqan kezde temeki shegýge qatań tyıym salynady.

Kólikterdiń janynda otshashýdy atýǵa bolmaıdy.

50 metr radıýsta órt qaýpi bar obektiler bolmaýy qajet.