Jańa jylda Ońtústik Qazaqstan oblysyndaǵy eki eldi meken taza aýyz sýmen qamtyldy

ShYMKENT. QazAqparat  - Ońtústik Qazaqstan oblysy Maqtaral aýdany Qyzylqum aýylyna taza aýyz sý berildi. Talaıdan beri tirshilik nárine qol jetkize almaı júrgen turǵyndar úshin bul jańa jyldaǵy tamasha tartý boldy. 

Óıtkeni, aýyldaǵy aǵaıyn kúni keshegi deıin aýyz sýǵa telmirip otyratyn,- dep habarlaıdy aımaqtaǵy "QazAqparat" tilshisi.

«Eldi mekenge sý júıesi ótken ǵasyrdyń 70-shi jyldary tartylǵan. Sodan beri jóndeý kórmegendikten, qubyrlardyń tozyǵy jetken. Shirigen qubyr ár jerden tesilip, jamaý-jamaý kúıge túsetin. Sol ýaqytta biz sýdy ózge aýyldan tasyp ne satyp ishýge májbúr boldyq»,-deıdi aýyl turǵyny kópbalaly ana Ánıpa Saǵymbetova. Aıta keterligi, qyzylqumdyqtardyń bas aýrýyna aınalǵan sý máselesiniń túıinin óńirge belgili kásipker Nuraly Ábishov sheship bergen. Aptal azamat óz qarjysynan 40 mıllıon teńge shyǵaryp, qubyrdy tolyqtaı jańalaǵan. Sonyń arqasynda qazir, aýylǵa tirshilik nári 24 saǵat úzdiksiz aǵyp tur.

Taýyq jyly Shymkenttiń mańyndaǵy Qaınarbulaq saıajaıynyń turǵyndary úshin de qýanyshpen bastaldy. Munda da taza aýyz sý berile bastap, alty jarym myńnan astam otbasy tirshilik nárine táýlik boıyna  qol jetkizip otyr. Qurylyspen «Stroı jol servıs KZ» JShS aınalysqan. Merdiger 366 shaqyrym qubyr tartqan.  Kestege sáıkes,  jumys 2016 jyldyń jeltoqsan aıynda aıaqtaldy. «Merdiger tarapynan sý eseptegish quraldar satyp alynyp, qyzmet kórsetýshi mekememen birlese 4980 qural ornatyldy. Sý eseptegish quraldardy ornatýmen qatar, turǵyndarǵa jeke esep shot ashylýda. Búgingi tańda, qalǵan abonentterge sý eseptegish quraldar ornatý jumystary jalǵasýda,-deıdi Shymkent qalasy ákimdiginiń turǵyn úı jáne kommýnaldyq sharýashylyq bólimi basshysynyń orynbasary N. Bektursynov.

                                                                                                                                                                                Almas Sultan