Jańa jyl qarsańynda qosymsha vagondar jolǵa shyǵady

BÝRABAI. QazAqparat - Jańa jyl merekesinde el ishinde qatynaıtyn barlyq baǵyttaǵy poıyzdarda qosymsha vagondar iske qosylady, dep habarlaıdy QazAqparat tilshisi.

«Qazir poıyz kestesi boıynsha taldaý júrip jatyr. Jańa jylda qosymsha poıyzdardy iske qosý josparda joq. Degenmen qosymsha vagondar bolady. Jolaýshylar aǵynyna qaraı poıyzdarǵa qosymsha vagondar tirkeledi. Qosymsha vagondar barlyq baǵyt boıynsha qosylady», - dedi «Jolaýshylar tasymaly» AQ bas dırektory Jánibek Taıjanov BAQ ókilderine arnalǵan baspasóz týrynda.

Bas dırektordyń málimdeýinshe, qosymsha vagondar 25 jeltoqsannan bastap saparǵa shyǵady.

Buǵan deıin «Jolaýshylar tasymaly» AQ basshysy elimizde poıyzdardyń jıi keshigý sebepterin ataǵan edi.

Onyń aıtýynsha, poıyzdardyń ýaqytyly kelmeýiniń bir sebebi - qolaısyz aýa raıy.

Aıta keteıik, tańerteń «Astana – Býrabaı» týrıstik elektr poıyzy jolǵa shyqty.

Jańa jyl merekesi qarsańynda elordadan Býrabaıǵa deıingi arnaıy týrıstik elektr poıyzy kún saıyn júredi.