Jańa jyl qarsańynda Іshki ister mınıstrligi pırotehnıkalyq buıymdar qaýpin eskertti

NUR-SULTAN. QazAqparat – Jańajyldyq merekelerdi ótkizýdegi qaýipsizdikti qamtamasyz etý maqsatynda 15 jeltoqsannan bastap polıtsııa jáne azamattyq qorǵaý organdarynyń qyzmetkerleri «Pırotehnıka» jedel-aldyn alý sharasyn ótkizedi, dep habarlaıdy QazAqparat.

Atalǵan shara sertıfıkattalmaǵan pırotehnıkalyq buıymdardyń jáne ruqsat berý qujattarynsyz saýda faktilerin anyqtaýǵa jáne jolyn kesýge baǵyttalǵan.

«Іshki ister mınıstrligi petardalar men Bengal ottary feıerverkterin satyp alý kezinde mindetti túrde ónimniń sertıfıkatyna nazar aýdarýǵa, pırotehnıkany paıdalaný erejelerimen tanysýǵa keńes beredi. Ony saqtaý jáne iske asyrý merzimine mán berińiz. Merzimi ótip ketken taýarlardy eshqandaı jaǵdaıda qoldanýǵa bolmaıdy», - dedi Nurdildi Oraz QR ІІM baspasóz alańynda ótken brıfıngte.

Pırotehnıkany iske qosý kezinde temeki shegýge qatań tyıym salynady jáne turaqtaǵy kólikterdiń janynda atýǵa bolmaıdy. 50 metr radıýsta órt qaýpi bar nysandar bolmaýy tıis.

«Kórermender feıerverkten 15-20 metr qashyqtyqta, tútin men buıymdardyń janbaı qalǵan bólikteri ushpaý úshin mindetti túrde jel jaǵynan turýy kerek. Otshashýdy qolmen qosýǵa tyıym salynady. Osyndaı qarapaıym erejelerdi ustaný ómirińiz ben densaýlyǵyńyzdy, jáne merekelik kóńil-kúıdi saqtaýǵa múmkindik beredi. Pırotehnıka – órttiń paıda bolýyna ǵana emes, adam densaýlyǵyna da eleýli zııan keltirýi múmkin qaýipti qural. Sol úshin pırotehnıkalyq buıymdardy paıdalaný erejelerin saqtaý qajet», - dedi N. Oraz.