Jańa jospar: Almatyda elektr jelileri jer astymen júrgiziledi

<p>ALMATY. KAZINFORM &mdash; Almaty qalasynyń 2030 jylǵa deıingi &laquo;Elektr jelilerin damytý jospary&raquo; ázirlendi. Bul týraly Almaty qalasy máslıhatynyń kezekti sessııasynda energetıka jáne sýmen jabdyqtaý basqarmasy basshysynyń mindetin atqarýshy Nurbaqyt Serikbaı málimdedi.</p>

Aıtýynsha, qujat elektr sapasyn jaqsartýǵa jáne qalanyń energetıkalyq ınfraqurylymyn damytýǵa baǵyttalǵan.

Elektr jelilerin damytý jospary energetıkalyq ınfraqurylym nysandaryn jańǵyrtý jáne salý baǵdarlamasyn qamtıdy, ol 2030 jylǵa deıingi kezeńdi, al bolashaqta 2040 jylǵa deıingi damý perspektıvasyn kózdeıdi. Qujatty ázirleý barysynda qalanyń energııa júıesiniń damý boljamy jasaldy, bul aldaǵy onjyldyqta qajetti resýrstardy tıimdi josparlaýǵa múmkindik beredi.

Almatynyń energetıka salasyn taldaý shuǵyl sheshimdi qajet etetin ózekti máseleler men erekshelikterdi anyqtady. Atap aıtqanda, 2030 jylǵa qaraı megapolıstiń tutyný qýaty 468 MVt-qa (48%-ǵa) ósip, 1450 MVt-ǵa jetedi dep kútilýde.

«Atalǵan derekterdi eskere otyryp, josparda negizgi mindetter qarastyrylǵan: jańa qosalqy stantsııalardy salý, elektr jelilerin qaıta qurý jáne jańǵyrtý, áýe jelilerin kabeldik jelilerge aýystyrý, jańa taratý pýnktterin ornatý jáne elektr berý jelilerin aýystyrý, sondaı-aq jańa tutynýshylardy qosý shekteýlerin joıý»,- dedi Nurbaqyt Serikbaı.

Sondaı-aq ol 2040 jylǵa qaraı barlyq joǵary voltty (220 jáne 110 kV) áýe jelilerin tolyq jerastyǵa kóshirý josparlanǵanyn atap ótti.

«Osyny eskersek, qaladaǵy kúzet aımaqtary 3-4 esege qysqaryp, qosymsha jer telimderin bosatady»,- dedi ol.

Osyǵan deıin, Almatyda kóshe shamdary jańasyna aýystyrylyp jatqany týraly jazǵan edik.