Jańa jol kartasy aıasynda turǵyn úıler salynady

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev jumyspen qamtýdyń jańa Jol kartasy aıasynda iske asyrylatyn jumystardy túsindirdi, dep habarlaıdy QazAqparat tilshisi.

«Búgin Premer-Mınıstrdiń tóraǵalyǵymen Memlekettik komıssııanyń otyrysy ótti. Osy oraıda birqatar máseleler qaralyp, onyń ishinde jumyspen qamtýdyń Jol kartasyn júzege asyrý talqylandy. Bólingen bir trıllıon teńgeniń 970 mlrd teńgege jýyǵy óńirler arasynda bólindi», - dedi mınıstr «Habar 24» telearnasynyń tikeleı efırinen.

Baǵdarlama áleýmettik, kóliktik ınfraqurylymdy, TKSh nysyndaryn jańartý men eldi mekenderdi abattandyrý arqyly jumys oryndaryn qurýǵa baǵyttalǵan.

«Budan bólek, jańa nysandardyń qurylysy eskerilgen. Osy rette 147 áleýmettik nysan, 56 turǵyn úı men jataqhana, 75 sýmen qamtamasyz etý nysany, 33 gazben qamtý nysany, 42 elektr energııasymen qamtamasyz etý nysany jáne basqa da qurylystar iske asyrylmaq», - dedi vedomstvo basshysy.

Belgili bolǵandaı, 73 myń jumys ornyn qura otyryp, 2,5 myńnan astam áleýmettik nysanda tıisti jumystar atqarylady. Bul turǵyda mektepter, aýrýhanalar, sport keshenderi men mádenıet úıleri qamtylady. TKSh-nyń 979 nysany jańartylady, ıaǵnı sý qubyrlary, jylýmen qamtamasyz etý men sý burý júıesi jóndeledi. Jalpy, 7 myńnan astam joba iske qosylyp, 240 myńǵa jýyq jumys orny qurylady.