Jańa jylda tamaqtan ýlanyp qalmańyz — epıdemıolog keńesi

<p>ALMATY. KAZINFORM &mdash; Óńirlik kommýnıkatsııalar qyzmetinde ótken baspasóz máslıhatynda almatylyq epıdemıolog tamaqtan ýlanbaýdyń qarapaıym erejelerin túsindirip berdi.</p>

Almaty qalasy Sanıtarlyq-epıdemıologııalyq baqylaý departamenti basshysynyń orynbasary Gaýhar Katkenova tamaqtan ýlanýdyń aldyn alý sharalary týraly aıtyp, jańa jyldyq ústelge arnalǵan ónimderdi qaýipsiz etip tańdaý erejelerin eske saldy.

— Mereke qarsańynda biz sanıtarlyq dárigerler retinde jańa jyldyq dastarhanǵa tamaq ónimderin tańdaý jáne tutyný kezinde qaýipsizdikti saqtaýdyń mańyzdylyǵyn eske salamyz. Tamaqtan ýlanyp qalmas úshin qarapaıym erejelerdi saqtaý mańyzdy: balǵyn ónimderdi tańdaý, jaramdylyq merzimderin tekserý jáne jabaıy bazarlardan tamaq almaý, — dep atap ótti G.Katkenova.

Sarapshy sonymen qatar taǵamdy saqtaý men daıyndaý kezinde nazar aýdarýdy qajet etetin tustardy atady.

Atap aıtqanda:

— Azyq-túlik tańdaý: balǵyn ónimderdi satyp alyńyz, jaramdylyq merzimin, qaptamanyń sapasyn tekserińiz jáne jabaıy bazarlardan satyp alýdan aýlaq bolyńyz.

— Sertıfıkattar: taýarlardyń sapa jáne qaýipsizdik sertıfıkattary bar ekenine kóz jetkizińiz.

— Saqtaý: temperatýralyq rejımdi saqtańyz, ásirese sút jáne et ónimderi úshin, shıki jáne daıyn taǵamdardy bólek saqtańyz.

— Gıgıena: tamaq daıyndaý kezinde qolyńyzdy únemi jýyńyz jáne sanıtarlyq normalardy saqtańyz.

— Termııalyq óńdeý: et pen balyqty jaqsylap pisirý kerek; daıyndyqty tekserý úshin pisirý termometrin qoldanýǵa bolady.

— Tamaqtaný: tamaqty ústel ústinde eki saǵattan artyq qaldyrmańyz jáne asty birneshe ret qyzdyrýdan aýlaq bolyńyz.

— Sýsyndar: alkogoldik sýsyndardyń qaptamasynyń zaqymdanýyn jáne jaramdylyq merzimin tekserińiz.

— Biz ata-analardy balalarǵa gıgıena negizderin úıretýge jáne júrek aıný, qusý nemese dıareıa sııaqty ýlaný belgileri týraly sóılesýge shaqyramyz. Mundaı belgiler paıda bolǵan jaǵdaıda dereý medıtsınalyq kómekke júgingen jón, — dep eskertti epıdemıolog.

Onyń aıtýynsha, usynylǵan usynystardy saqtaý tamaqtan ýlanýdy boldyrmaýǵa jáne mereke kúnderin qaýipsiz jáne qýanyshty etýge múmkindik beredi.

Osyǵan deıin, Almatyda jańa jyldyq shyrshalar jármeńkesi ótip jatqany týraly jazǵan edik.