Jańa jyl qarsańynda jádel járdem 27 myńǵa jýyq shaqyrtý boıynsha qyzmet kórsetti

<p>ASTANA. KAZINFORM - Jańa jyl qarsańynda elimizdegi shuǵyl medıtsınalyq qyzmetter turǵyndarǵa qyzmet kórsetý umysyn jalǵastardy, dep habarlaıdy QR Densaýlyq saqtaý mınıstrliginiń baspasóz qyzmeti.</p>

Ótken jyldyń jeltoqsan aıynyń sońǵy táýliginde elimiz boıynsha jedel medıtsınalyq járdem pýltine turǵyndardan 27 myń shaqyrtý tústi. Onyń ishinde 17 myńnan astam shaqyrtý jedeldiliktiń 1 - 3-sanatyna tıesili, 4-sanat boıynsha jedel járdem brıgadalary 10 myńnan astam ret shaqyrtýǵa shyqty.

Bul rette eń kóp shaqyrtýlar Almaty oblysynda tirkeldi – 3073, odan keıin Almatyda – 2800, Túrkistanda – 2358 jáne Astanada jyldyń sońǵy kúninde jedel járdem 1942 shaqyrtýǵa shyqty.

Bıylǵy 11 aıda Qazaqstandaǵy jedel medıtsınalyq járdem (JMJ) brıgadalary 7, 7 mln-nan astam shaqyrtýǵa qyzmet kórsetti, onyń ishinde 1-3-sanat - 4,9 mln. shaqyrtýǵa jáne 4-sanattaǵy 2,8 mln. shaqyrtýǵa emhanalardyń janyndaǵy brıgadalar qyzmet kórsetti.

Ótken jylmen salystyrǵanda shaqyrtýlar sanynyń artýyna qaramastan, tabysty reanımatsııanyń negizgi kórsetkishi 7,1%-ǵa artyp, barlyq jaǵdaılardyń 51,7%-na jetti.

Jedel medıtsınalyq járdem memleket kepildik bergen medıtsınalyq kómektiń (TMKKK) sheńberinde kórsetiledi, azamattar úshin áli de tegin jáne táýlik boıy, aptasyna jeti kún qoljetimdi bolyp qalady.

Qazirgi ýaqytta el boıynsha jedel medıtsınalyq járdem qyzmetin 20 derbes stantsııa, 98 qalalyq kishi stantsııa jáne 232 aýdandyq bólimshe usynady.

- Oblystyq jáne qalalyq jedel járdem stantsııalarynda bir aýysymda 1 491 kóshpeli brıgada jumys isteıdi, MSAK uıymdarynyń (emhana) janyndaǵy jedeldiliktiń 4-sanatyndaǵy shaqyrtýlarǵa qyzmet kórsetý úshin 446 brıgada jumys isteıdi, - delingen habarlamada.

Osyǵan deıin elimiz boıynsha jańa jyl túninde 181 bala dúnıege kelgenin habarladyq.