«Jańa Jibek joly» baǵytyndaǵy ekspedıtsııa Tarazǵa jetti
Ekspedıtsııa qatysýshylary Ejelgi Tarazdyń eki myń jyldyq tarıhymen tanysty. Erte kezden beri Uly Jibek jolynyń boıynda turǵandyqtan bul qalanyń mańyzy óte joǵary bolǵan. Bul - kópester men qolónershilerdiń qalasy, munda Azııa men Eýropa arasyndaǵy saýda joldary toǵysqan. Qazirgi Tarazdyń mańynda tarıhı oqıǵalardyń kýási bolǵan eskertkishter óte kóp, olar: Qarahan men Dáýitbek keseneleri, ámirshilerdiń saraılary, ejelgi arhıtektýranyń erekshe týyndylary - Babajy qatyn jáne Aısha bıbi keseneleri, Tekturmas kesheni, Aqyrtas qalashyǵy, Qalı Júnis monshasy, qala ornyna turǵyzylǵan «Ejelgi Taraz» arheologııalyq saıabaǵy jáne taǵy basqalary. Babajy qatyn men Aısha bıbi keseneleri ıÝNESKO dúnıejúzilik murasynyń tizimine kiredi. Sondaı-aq, ekspedıtsııa músheleri Taraz qalasynan 40 shaqyrym jerdegi Aqyrtas qalashyǵyna bardy.
«Tarıhy tereń qalamyz búginde mádenı jáne tarıhı eskertkishterge baı, olar týraly ańyzdar shetelderde de asa tanymal. Bul fakt osy aımaqtyń týrıstik áleýetine yqpal etetini sózsiz. Arheologtar jyl saıyn Taraz mańynan ártúrli buıymdar men jádigerlerdi taýyp alady, olar jergilikti murajaılarda saqtaýly. Biz, óz tarapymyzdan ınfraqurylymdy damytýǵa, týrısterdiń qaýipsizdigin qamtamasyz etip, olarǵa jaıly jaǵdaı jasaý úshin qolymyzdan kelgenniń bárin jasaımyz», - dedi Taraz qalasy ákiminiń orynbasary Ermek Qarabaev.
Tarazdyń jáne onyń aınalasynyń kórikti jerlerin kórip bolǵan soń, joba qatysýshylary Jambyl jáne Túrkistan oblystarynyń aýmaǵynda ornalasqan, Orta Azııa men Qazaqstandaǵy eń eski qoryqtardyń biri Aqsý-Jabaǵylyǵa bet alady.
Ary qaraı olar Batys Tıan-Shan taýlarynyń soltústik-shyǵysyndaǵy Saıram-Ógem memlekettik ulttyq tabıǵı saıabaǵyna baryp, sol jerden teńiz deńgeıinen 2350 metr bıikte ornalasqan Saıramsý kólin kórip qaıtady. Sondaı-aq qatysýshylar Túrkistan oblysynyń aýmaǵyndaǵy Otyrar qalasy, Arystan bab, Qoja Ahmet ıAssaýı keseneleri, Saýran qalasy men basqa da nysandar tárizdi arheologııalyq jáne tabıǵı eskertkishterge barady.
Eske sala keteıik, «Uly Dala Eline saıahat» jobasy Qazaqstan aımaqtaryna jasalatyn eń iri ekspedıtsııa. Ekspedıtsııa alty baǵyt boıynsha alty týrıstik klasterdi qamtı otyryp, mańyzdy tabıǵı nysandarǵa barý arqyly júrgiziledi. Ekspedıtsııasynyń maqsaty - jańa týrıstik baǵyttardy jasaý úshin tabıǵı, tarıhı, kıeli mekenderi zertteý, ishki týrızm men ınfraqurylymdy damytý, jáne týǵan eldi zertteý. Oǵan qosa, ekspedıtsııa týraly materıaldar Qazaqstannyń týrıstik destınatsııa retinde tanylýyna jáne halyqty ishki týrızmge tartýǵa yqpal etedi. Ekspedıtsııa nátıjesinde elimizdiń tabıǵı nysandary boıynsha jańa týrıstik baǵyttar, sapaly foto-jáne vıdeobankter qurylady. Olardyń qazirgi jaǵdaıy týraly ózekti aqparat alynady, ıllıýstratsııalanǵan jolnusqa jasalatyn bolady.
Mádenıet jáne sport mınıstrliginiń Týrızm ındýstrııasy komıtetiniń tapsyrysy boıynsha ekspedıtsııany uıymdastyrýshy «Kazakh Tourism» UK. «Jańa Jibek joly» ekspedıtsııasynyń baǵytyn «QazaqGeography» RQB júzege asyrýda.
«Jańa Jibek joly» baǵyty boıynsha ekspedıtsııa toby 17 qyrkúıekte Almaty qalasynan shyqqanyn esterińizge sala keteıik. 13 kúnde qatysýshylar Almaty, Jambyl jáne Túrkistan oblystaryna baryp qaıtatyn bolady.
Ekspedıtsııa quramy tájirıbeli saıahatshylardan, týroperator ókilderi men sheteldik jáne qazaqstandyq trevel-blogerlerden, sondaı-aq «National Geographic Reseı» komandasynan quralǵan.
Ekspedıtsııanyń alǵashqy kúnderi Almaty oblysynda ótti. Qatysýshylar Qazaqstan-Qytaı shekarasynda bolyp, Qorǵas beketine barar jolda Jarkenttegi erekshe meshitke soqty. Bul meshit birde bir shegesiz, Tıan-Shan shyrshasynan salynǵan. Ary qaraı ekspedıtsııa músheleri Qazaqstandaǵy eń kórikti jerlerdiń biri - Kólsaıǵa baryp, onyń sulý kólderi men Qaıyńdy kólin tamashalady.
Ary qaraı ekspedıtsııa Aqtaý taýyna, Aıǵaıqumǵa, Shoqan Ýálıhanov bulaǵyna, Talhız qalashyǵyna baryp, sońynan Almaty qalasynyń kórikti jerleri: «Medeý» muzaıdynyn, «Shymbulaq» TShK men Úlken Almaty kólin kórdi. Sondaı-aq saıahatshylar Almaty oblysynda ıÝNESKO dúnıejúzilik murasynyń nysany bolyp tabylatyn Tamǵaly shatqalyna baryp qaıtty.