Jańa Zelandııada Qazaqstannyń qurmetti konsýldyǵy ashyldy

SINGAPÝR. QazAqparat – Qazaqstannyń Sıngapýrdaǵy jáne Aýstralııa men Jańa Zelandııadaǵy qyzmetin qosa atqarýshy Elshisi Arken Arystanov Jańa Zelandııanyń eń iri qalasy – Oklendte Qazaqstannyń Qurmetti konsýldyǵynyń saltanatty ashylý rásimine onlaın rejımde qatysty, dep habarlaıdy QR SІM baspasóz qyzmeti.

Qurmetti konsýl bolyp Beesley Investments Limited konsaltıngtik kompanııasynyń dırektory Braıan Eshlı Djonson taǵaıyndaldy.

B.Djonson myrza kóptegen jyldar boıy qazaqstandyq-jańa zelandııalyq ózara is-qımyldy keńeıtýge járdemdesedi, atap aıtqanda, Almaty Regbı klýbymen yntymaqtasady, sondaı-aq Jańa Zelandııadaǵy Qazaqstan azamattaryna belsendi túrde járdem kórsetedi. Sonymen birge, ol Jańa Zelandııadaǵy Beıbitshilik sýdıasy (Justice of the peace) bolyp tabylady.

Kezdesýge Qazaqstannyń Aýstralııadaǵy Bas konsýly Marat Qalıjanov jáne qurmetti konsýldary Endrıý Fernıhoý (Melbýrn q.) jáne Djeıson Stırbınskıs (Pert q.) qatysty.

A.Arystanov 2021 jyl úlken datamen - Qazaqstan Táýelsizdiginiń 30 jyldyǵymen tuspa-tus kelgenin jáne Qazaqstannyń Jańa Zelandııa jáne Aýstralııamen ekijaqty qarym-qatynastaryn ilgeriletýde belsendi jumysty jalǵastyrý qajettigin atap ótti.

Aıta keteıik, Qurmetti konsýldyq – ózi ókildik etetin eldiń memlekettik qyzmetinde turmaı, sol eldiń jáne onyń azamattarynyń quqyqtary men múddelerin qorǵaýdy qosa, biraq vızalar men ózge de resmı qujattardy berýdi qospaǵanda, ókildik etetin memlekettiń tapsyrmasymen jáne bolý eliniń kelisimimen aqysyz negizde keıbir konsýldyq mindetterdi atqaratyn Qurmetti (shtattan tys) konsýl basqaratyn mekeme.