Jańa Zelandııada ekpege narazy top joldardy jaýyp tastady

NUR-SULTAN. QazAqparat – Jańa Zelandııada koronavırýsqa qarsy vaktsına salýǵa narazylyq bildirýshiler eldiń parlamenti ǵımaratyna aparatyn joldardy jaýyp tastady, dep habarlaıdy QazAqparat euronews aqparat agenttigine silteme jasap.

Jan-jaqtan jınalǵan júzdegen adam muǵalimder men dárigerler, polıtseıler men áskerı qyzmetkerlerdiń mindetti ekpe alýyna narazylyq bildirdi. Olar jazǵy demalystan keıin jumysyn bastaǵan Parlamenttiń janyndaǵy kóshelerge jeńil jáne júk kólikter, mototsıklderin qoıyp, jol qozǵalysyn toqtatyp tastaǵan.

«Munyń bári tańdaý erkindigi jáne óz aǵzamyzdy óz betinshe basqarý erkindigi», - deıdi aktsııaǵa qatysýshylardyń biri.

«Men ekpe alýdy jaqtaımyn. Vaktsına alǵan durys. Biraq biz ony qalaımyz ba, qalamaımyz ba, ózimiz sheshe bilýimiz kerek», - deıdi taǵy bir jańazelandııalyq.

Jańa Zelandııanyń premer-mınıstri Djakında Ardern narazylarmen kezdesýden bas tartty.

Aıta keteıik, qańtar aıynyń sońynda Jańa Zelandııada «omıkron» shtamyn juqtyrǵandar sany ósti.