Jańa Zelandııa: Eki meshitte 51 adamdy atyp óltirgen Brenton Tarrant sottaldy

NUR-SULTAN. QazAqparat – Jańa Zelandııa soty eki meshitte 51 adamdy atyp óltirgen Brenton Tarrantty ómir boıy bas bostandyǵynan aıyrý jazasyna kesti. Ol el tarıhynda osyndaı úkim shyǵarylǵan alǵashqy adam boldy.

Avstrııanyń 29 jastaǵy azamaty Brenton Tarrant 51 adamdy óltirip, taǵy 40 adamdy óltirmek bolǵany jáne lańkestik áreket jasaǵany úshin aıypty dep tanyldy, dep habarlaıdy QazAqparat VVS agenttigine silteme jasap.

Sýdıa onyń áreketterin «aıýandyq» dep atady.

Byltyr naýryz aıynda tikeleı efır arqyly kórsetilgen meshittegi shabýyl búkil álemdi dúrliktirdi.

Tarrantqa qatysty sot úkimi Jańa Zelandııa tarıhynda lańkestikke qatysty alǵashqy aıyptaý úkimi bolǵan. Eldiń ádil sot júıesinde ólim jazasy qoldanylmaıdy. Bul qylmystan keıin Jańa Zelandııada qarý týraly qatań zańdar shyǵaryldy.

Tarrant sot úkimin shyǵarýǵa qatysýdan bas tartty.

Sot úkimin tyńdaý dúısenbi kúni bastaldy, alǵashqy úsh kún jábirlenýshilerdi tyńdaýǵa arnalǵan.

Buǵan deıin habarlanǵandaı, kúdikti er adam ótken jyldyń naýryz aıynda eki meshitke shabýyl jasaǵan.

Ol áýeli Ál-Nur meshitinde oq jaýdyra bastady. 30 cekýnd ótken soń, kóligine qaıtyp oralǵan ol basqa qarý alyp, meshittiń ishindegi adamdarǵa qaıta oq jaýdyrǵan. Bul shabýyl Facebook áleýmettik jelisindegi tikeleı efır arqyly kórsetilgen.

Odan keıin Tarrant Lınvýd Islam ortalyǵyna baryp, onda kóshede júrgen eki adamǵa oq atyp, odan keıin terezelerge oq jaýdyrdy.

Qamaýǵa alynǵan Tarrant polıtsııaǵa onyń jospary áýeli shabýyl jasap, odan keıin meshitterdi órtep jiberý bolǵanyn aıtty.

Qylmyskerdiń taǵy bir meshitke shabýyl jasamaq bolǵany, biraq jolda polıtsııa qyzmetkerleriniń qolyna túskeni habarlanyp otyr.