Jańa zań jobasynda ishki naryqty sapaly ónimmen qamtamasyz etý qadamdary eskerilgen

NUR-SULTAN. QazAqparat – Ónerkásip salalaryn qoldaýdan óńdeýshi ónerkásiptiń tıimdi kásiporyndaryn yntalandyrýǵa kóshý júzege asyrylady. Bul týraly Májiliste «Ónerkásiptik saıasat týraly» zań jobasyn tanystyrý kezinde QR Indýstrııa jáne ınfraqurylymdyq damý vıtse-mınıstri Amanııaz Erjanov málim etti, dep habarlaıdy QazAqparat tilshisi.

«Instıtýtsıonaldyq qamtamasyz etý aıasynda qujattyń 2-bóliminde Ónerkásipti damytý qory men «Ónerkásip» aqparattyq júıesin qurý jáne onyń qyzmetin júzege asyrý máseleleri rettelgen. Ónerkásipti damytý qory ónerkásiptik-ınnovatsııalyq qyzmetti memlekettik yntalandyrý is-sharalaryn usyný jónindegi operator bolady. Qazaqstan Respýblıkasy ónerkásibiniń aqparattyq júıesi ónerkásip salalarynyń jaı-kúıi, olardyń damý boljamy jáne memlekettik yntalandyrý is-sharalary týraly aqparatty qamtıtyn aqparattyq júıe qyzmetin atqarady. Qazaqstan Respýblıkasynyń Ulttyq kásipkerler palatasy ónerkásiptiń aqparattyq júıesiniń menshik ıesi jáne operatory bolady», - dedi vıtse-mınıstr.

Onyń aıtýynsha, zań jobasy aıasynda ónerkásip salalaryn qoldaýdan óńdeýshi ónerkásiptiń tıimdi kásiporyndaryn yntalandyrýǵa kóshý júzege asyrylady. Munda ishki naryqty sapaly ónimmen qamtamasyz etýge jáne eksportqa shyǵýǵa basa nazar aýdarylady.

«Zań jobasynda Indýstrııa jáne ınfraqurylymdyq damý mınıstrligine qosylǵan quny joǵary jáne ónimdik kúrdeliligi bar orta ári joǵary qaıta bólinistegi basym taýarlar tizbesin qalyptastyrýǵa quzyret berý kózdeledi. Operatorlar óńdeýshi ónerkásip kásiporyndaryn memlekettik yntalandyrý sharalaryn kórsetý kezinde osy tizbeni basshylyqqa alady», - dedi Amanııaz Erjanov.

Sondaı-aq zań jobasynda:

- yntalandyrý sharalaryn kórsetýdiń teńgerimdi qaǵıdatyn iske asyrý;

- básekege qabilettilikti arttyrý týraly kelisim jasasý arqyly yntalandyrý sharalarynyń quramdastyrylǵan paketin alý múmkindigi;

- jańa quraldardy engizý jáne qoldanystaǵylardy reınjınırıngteý kózdelgen.

«Osy bólim aıasyndaǵy zań jobasynyń negizgi jańashyldyǵy - ónerkásiptik saıasatqa ıkemdilik pen jedeldilik berýge saıady. Zań jobasynda Úkimetke Ulttyq ekonomıkanyń, onyń ishinde onyń ónerkásiptik-ınnovatsııalyq quramdas bóliginiń turaqtylyǵy men ornyqty damýyn qamtamasyz etý, ónerkásipti memlekettik yntalandyrýdyń jańa sharalaryn engizýdi, olardy joıýdy jáne qaıta qaraýdy, sondaı-aq olardy qoldaný tártibin kózdeıtin qaýlylar qabyldaý quzyreti beriledi. Mundaı sharalar VAK-tyń ónerkásiptik saıasat jónindegi usynymdary negizinde qabyldanady», - dedi vıtse-mınıstr.

Budan buryn habarlanǵandaı, búgin Májiliste «Ónerkásiptik saıasat týraly» zań jobasy men oǵan ilespe qujat tanystyryldy.

Ónerkásiptik saıasatty tıisti úılestirýdi qamtamasyz etý úshin negizgi zań jobasynda Ónerkásiptik saıasat jónindegi vedomstvoaralyq komıssııa (VAK) qurylmaq.