Jańa zań jobasy jappaı ereýil kezinde áskerdi paıdalanýǵa múmkindik beredi
Májilis otyrysynda «QR keıbir zańnamalyq aktilerine quqyq qorǵaý qyzmetin ótkerý tártibin jetildirý máseleleri boıynsha ózgerister men tolyqtyrýlar engizý týraly» zań jobasy ekinshi oqylymǵa shyǵaryldy.
«Qańtar oqıǵasynda birqatar zańdaǵy sáıkessizdikter anyqtaldy, sonyń saldarynan kúsh organdarynyń, jedel shtabtardyń is-qımyly tıisti deńgeıde úılestirilgen joq, is júzinde tótenshe jaǵdaıdy joıý úshin kúsh-quraldar birligi bolmady. Sondyqtan, salalyq zańdarda endi áleýmettik sıpattaǵy tótenshe jaǵdaılardyń aldyn alý jáne olardy joıý jónindegi memlekettik organ basshylarynyń derbes jaýapkershiligi engiziledi», - dedi G. Bıjanova Májilistiń jalpy otyrysynda.
Óz kezeginde, Prezıdentke áleýmettik sıpattaǵy TJ jáne TJ rejımderin qamtamasyz etý boıynsha qosymsha ókilettikter beriledi.
«Endi tótenshe jaǵdaı engizilgende Memleket basshysy mundaı rejımdi qamtamasyz etý jónindegi memlekettik komıssııany qurady jáne onyń tóraǵasyn taǵaıyndaıdy. Ol kez kelgen memlekettik organnyń nemese quqyq qorǵaý blogynyń ókili bola alady. «Daǵdarys jaǵdaıy» jáne «Áleýmettik-ekonomıkalyq saladaǵy daǵdarystyq jaǵdaı» uǵymdary da bólindi, respýblıkalyq jáne óńirlik jedel shtabtar men memlekettik organ máseleleri naqty aıqyndaldy. Endi jedel shtab sheshimin búkil azamattar oryndaýǵa mindetti bolady», - dep túsindirdi G. Bıjanova.
Sonymen birge, áleýmettik sıpattaǵy TJ kezinde ortalyq jáne jergilikti memlekettik organdardyń baılanys quraldary men jelileri ajyratylmaıdy.
Buǵan ishki ister organdary, tótenshe jaǵdaılar qyzmetteri – jedel járdem, TJM qutqarýshylary men órt sóndirýshiler, oq-dári tasymaldaý uıymdary jáne basqalar kiredi.
Qańtar aıynda bul qyzmetterde baılanyspen qıyndyq týyndaǵan edi.
«Tótenshe jaǵdaı qashan jáne qandaı jaǵdaıda engiziletini jáne áleýmettik sıpattaǵy TJ qashan bolatyny naqty anyqtaldy. Bul qazirgi zańdarda joq. Árqaısysy úshin ózindik erekshe jaǵdaılar bar. Mysaly, jappaı ereýilder – áleýmettik sıpattaǵy TJ, al qarýlanǵan jappaı tártipsizdik – TJ. Eki mysaldyń da ózindik erekshelikteri men quqyqtyq rejımderi bar. Qazir zań boıynsha áleýmettik sıpattaǵy TJ kezinde áskerdi paıdalanýǵa bolmaıdy. Endi jedel shtabtyń usynysymen Prezıdenttiń Jarlyǵy negizinde bul múmkin bolady», - dedi G. Bıjanova.
Jergilikti jerdiń komendanty Prezıdentten zańmen belgilengen jaǵdaılarda Qarýly Kúshterdi qoldanýdy suraı alady.
Oblystardyń (astananyń, respýblıkalyq mańyzy bar qalanyń) ákimderi de jedel shtab basshylary retinde áleýmettik sıpattaǵy TJ engize alady.
Memlekettik kúzet qyzmetiniń ókilettikteri kúsheıtildi. Endi olarǵa jedel shtabqa, memlekettik komıssııaǵa nemese komendantqa qaramaı, kúzet jáne jedel is-sharalar júrgizý, basqa memlekettik organdardyń kúshteri men quraldaryn tartý quqyǵy beriledi.
Buǵan deıin depýtat qyzmette qaza tapqan jáne múgedek bolǵandardyń balalary Qazaqstandaǵy kez kelgen JOO-da tegin oqıtynyn aıtqan edi.
Sondaı-aq, Qańtar oqıǵasynan keıin bılik ókiline baǵynbaý, kúsh qoldaný úshin jaza kúsheıtildi.