Jańa zań jobasy travmatıkalyq qarýdy azamattyq aınalymnan alyp tastaýdy kózdeıdi - QR Bas prokýrory

ASTANA. 28 mamyr. QazAqparat - Búgin Bas prokýratýrada Zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi Úılestirý keńesiniń kezekti otyrysy boldy. Onda atys qarýlarynyń, oq-dárilerdiń jáne jarylǵysh zattardyń zańsyz aınalymyna qarsy kúres jáne olarǵa tosqaýyl qoıýdyń tıimdiligin artyrý máseleleri qaraldy.

Sondaı-aq, atys jáne travmatıkalyq qarýlarmen jasalatyn qylmystardyń kóbeıýi qarý ıelerine zań turǵysynan salynatyn tyıymdardy kóbeıtýge negiz boldy. Bul týraly Bas prokýror Ashat Daýylbaev aıtty. «Bul zań jobasy qoǵamdyq tártipti kúsheıtip, travmatıkalyq qarýdy baqylaýsyz qoldanýdy azaıtady», - dep atap ótti ol.

Onyń aıtýynsha, QR Іshki ister mınıstrligi ázirlegen bul zań jobasy travmatıkalyq qarýdy azamattyq aınalystan alyp tastap, ony qyzmettik qarýlar qataryna qosýdy kózdeıdi.

Bas prokýratýranyń keltirgen derekteri boıynsha, travmatıkalyq qarýmen jasalatyn qylmystardyń sany 8 esege - 2008 jyly 46-dan 2012 jyly 375-ke deıin ósken. Bıylǵy jyldyń basynan beri 139 osyndaı qylmys jasalǵan.

Aıta ketý kerek, Keńestiń jumysyna Úılestirý Keńesiniń músheleri, Parlament depýtattary, Іshki ister, Qorǵanys, Tótenshe jaǵdaılar, Indýstrııa jáne jańa tehnologııalar mınıstrlikteriniń, Kedendik baqylaý komıtetiniń jetekshileri qatysty.