Jańa zań: Jasóspirimderge esirtki satqandar ómir boıyna sottalady

NUR-SULTAN. QazAqparat – QR Bas Prokýrorynyń orynbasary Marat Ahmetjanov esirtki qylmysy úshin jaýapkershilikti kúsheıtý sharalaryn túsindirdi, dep habarlaıdy QazAqparat tilshisi.

Memleket basshysy qol qoıǵan Qylmystyq, qylmystyq-protsestik zańnamany jetildirý boıynsha QR Zańy arqyly esirtkini nasıhattap, zańsyz jarnamalaǵany úshin (Qylmystyq kodekstiń 299-1-baptary) 6 jylǵa deıin bas bostandyǵynan aıyrý jazasy engizildi.

«Esirtki zatyn satýdyń jańa tásilderin taýyp, úıler men jataqhanalardyń qabyrǵasyna ashyqtan-ashyq habarlama ilip ketetin narkodılerlerdiń áreketi qoǵamdy alańdatyp otyr. Endi bul áreket zańmen jazalanady jáne aýyr qylmys bolyp sanalady», - dedi Marat Ahmetjanov QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda.

Spıkerdiń aıtýynsha, zańsyz aınalym úshin jaýapkershilikti kózdeıtin baptarda (QK 297-b.) jáne esirtki paıdalanýǵa kóndirgeni úshin (QK 299-b.) «Elektrondyq aqparattyq resýrstardy paıdalaný» jáne «Qoǵamdyq oryndarda» degen jańa saralaý belgileri engizildi.

«Budan bylaı ınternet arqyly, túngi klýbta, dámhanada, parktegi esirtki aınalymy úshin 15 jylǵa deıin bas bostandyǵynan aıyrýǵa, al kámeletke tolmaǵan adamǵa osyndaı tásilmen esirtki satqandar ómir boıyna bas bostandyǵynan aıyrylady», - dedi M. Ahmetjanov.