Jańa zań lýdomandardyń otbasyn qorǵaýǵa kómektesedi – qoǵam belsendisi
Keshe Memleket basshysy «Qazaqstan Respýblıkasynyń keıbir zańnamalyq aktilerine oıyn bıznesi, lotereıa qyzmeti, densaýlyq saqtaý, memlekettik eńbek ınspektsııasy, memlekettik baqylaý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıǵan bolatyn.
Almatyda qumar oıyndarǵa qushtar jastardyń azaıýyna atsalysyp júrgen qoǵam belsendileriniń biri, «Haq-Nazar» QQ tóraǵasy Nurjan Jakýpov jańa zańnyń tıimdiligi týraly aıtty.
- Bul zań jobasynyń biraz ýaqyttan beri talqylanyp keldi. Endi qabyldanǵan zań qoǵamǵa oń áser etedi oılaımyn. Ásirese, Boryshkerlerdiń biryńǵaı tiziliminde turǵan tulǵalarǵa bás tigýge tyıym salý – óte jaqsy sheshim. Óıtkeni adam bul tiziliminde bola tur qumar oıyndarǵa qatysatyn bolsa, bul naǵyz lýdomanııanyń kórinisi. Aıtylǵan zań lýdomandardyń otbasyn qorǵaýǵa kómektesedi. Sebebi mundaı adamdar óz otbasy músheleriniń atynan jıi qaryz alady. Sondaı-aq býkmekerlik keńselerge sport salasynan bólek jerde jarnama jasaýǵa shekteý qoıyldy. Bul da durys sheshim, óıtkeni jarnama – jańa adamdardy qumar oıyn bastaýǵa jáne lýdomanııadan emdelip júrgen adamnyń oıynǵa qaıta oralýyna ıtermeleıdi. Osy shekteýlerdi eskere otyryp qabyldanǵan zańdy tıimdi dep aıta alamyn, – dedi ol.
Nurjan Jakýpov lýdomanııamen kúresýge baǵyttalǵan «Vne ıgry» jobasynyń maqsat-mindetter týraly da aıtyp ótti.
- «Vne ıgry» jobasy aıasynda biz lýdomanııaǵa qatysty zertteý júrgizemiz jáne bılik tarapymen, Parlamentpen, jergilikti atqarýshy organdarmen jumys isteımiz. Oqý oryndarynda profılaktıkalyq is-sharalar ótkizip, lektsııa oqımyz. Qumar oıyndarǵa táýeldi adamdardyń týǵan-týysqandaryna kómektesip, lýdomanııadan qaı jerde, qalaı emdelýge bolatynyn túsindiremiz, – dedi qoǵamdyq qor tóraǵasy.