Jańa zań BAQ-tyń kommertsııalyq múmkindikterin de arttyrady – Aıda Balaeva

NUR-SULTAN. QazAqparat – Aqparat jáne qoǵamdyq damý mınıstri Aıda Balaeva halyq aldyndaǵy eseptik kezdesýinde BAQ týraly zańdarǵa engizilgen túzetýler men ózgeristerge toqtaldy, dep habarlaıdy QazAqparat tilshisi.

«Degenmen, biz ómir súrip jatqan aqparattyq ǵasyrdyń óz talaptary bar. Eń bastysy – ýaqyt kóshinen oza jumys isteý. Bul salany damytý máselelerine ǵana emes, týyndaǵan problemalardy kúndelikti sheshýge de qatysty talap. Ózekti jáne jumys isteıtin normatıvtik-quqyqtyq negiz bolmasa, álemdik aqparattyq keńistikten tys qalý qaýpi bar», - degen mınıstr osy baǵytta qandaı zańnamalyq sharalar qabyldanǵanyn atap ótti.

«Birinshiden, 2020 jylǵy 30 jeltoqsanda «Qazaqstan Respýblıkasynyń keıbir zańnamalyq aktilerine aqparat máseleleri boıynsha ózgerister men tolyqtyrýlar engizý týraly» Zań qabyldandy. Ol memlekettik aqparattyq tapsyrystyń tıimdiligin ǵana emes, sonymen qatar BAQ-tyń kommertsııalyq múmkindikterin de arttyrýǵa jaǵdaı jasaıdy», - dedi Aıda Balaeva.

Vedomstvo basshysy salanyń júıeli problemalaryn, onyń ishinde «Buqaralyq kommýnıkatsııa quraldary týraly» Zańdy jetildirý sharalaryn qamtıtyn aqparat salasyn damytýdyń 2020-2022 jyldarǵa arnalǵan ulttyq jospar bekitilgenin eske saldy.

«Salanyń kadrlyq áleýetiniń kásibı deńgeıin arttyrý salasynda júıeli jumys bastaldy. «2020-2021 jyldarǵa arnalǵan medıasala mamandaryn oqytý jónindegi arnaıy jospar» ázirlendi. Eń aldymen, bul salalyq jýrnalıstıkaǵa qatysty», - dedi Aqparat jáne qoǵamdyq damý mınıstri.