Jańa úlgidegi járdemaqy jambyldyq 22 myńnan astam kópbalaly otbasyǵa beriledi
Kelesi jyly memlekettik áleýmettik qoldaý júıesi ózgeredi. Bir aıta ketetini, kámeletke tolmaǵan tórt nemese odan da kóp balasy bar januıalarǵa arnaýly memlekettik járdemaqynyń bul túri osyǵan deıin taǵaıyndalmaǵan.
Bul, Memleket basshysy Qasym-Jomart Toqaevtyń Joldaýda aıtqan tapsyrmasyna saı ázirlengen júıe. Eńbek jáne halyqty áleýmettik qorǵaý mınıstrligi ataýly áleýmettik kómek kórsetýdiń jańa tetikterin qarastyra kele, tabysy az jáne kópbalaly otbasylardy qoldaýdyń negizgi úsh baǵytyn naqtylady.Taıaýda mınıstrlik tıisti zań jobasyn Parlament qaraýyna usynýdy josparlap otyr.
«Endi memlekettik járdemaqy tórt nemese odan da kóp kámeletke tolmaǵan nemese 23 jasqa deıingi kúndizgi bólimde oqıtyn balalary bar barlyq kópbalaly otbasylarǵa tabysyna qaramastan tólenedi. Onyń mólsheri bala sanyna qaraı belgilenedi. Ataýly áleýmettik kómekti tóleýde eń tómengi kúnkóris deńgeıiniń 70 paıyzy taǵaıyndaýdyń shekti krıterııi bolyp qala beredi. Onymen qosa, eger eńbekke qabiletti otbasy múshesi usynylǵan jumyspen qamtýǵa járdemdesý sharalarynan bas tartsa, onda atalǵan tólem tek oǵan ǵana emes, búkil otbasyna da berilmeıdi», - deıdi oblystyq Baqylaý jáne áleýmettik qorǵaý departamentiniń №1 zeınetaqy jáne áleýmettik qamsyzdandyrý bóliminiń basshysy Raıhan Nazarova.
Aıta keteıik, oblysta ataýly áleýmettik kómekke jyl sońyna deıin 21,5 mıllıard teńge qarastyrylǵan. Búgingi kúnge 35,5 myń otbasyna 15,6 mıllıard teńgeniń ataýly áleýmettik kómegi tólengen. Sondaı-aq, AÁK taǵaıyndaý jáne tóleý barysynda kemshilikterdi joıý úshin 6914 otbasynyń qujattaryn qaıta tekserý jumystary júrgizilip, onyń ishinde 933 otbasyna zańsyz taǵaıyndalǵan 133,5 mıllıon teńgeni bıýdjetke qaıtarý qajettigi anyqtalǵan bolatyn. Búgingi kúnge 33,6 mmıllıon teńge bıýdjetke qaıtaryldy. Qalǵan somany qaıtartý boıynsha tıisti jumystar júrgizilýde.