Jańa úkimetaralyq komıssııa Kaspıı teńizinde bekire balyqtaryn aýlaýǵa moratorıı tetikterin daıarlaıdy

ASTANA. QazAqparat - Jańa úkimetaralyq komıssııa Kaspıı teńizinde kommertsııalyq negizde bekire tuqymdas balyqtardy aýlaýǵa moratorıı tetikterin daıarlaıdy. Bul týraly búgin Kaspıı teńiziniń sý bıologııalyq resýrstary jónindegi komıssııanyń 36-shy otyrysy barysynda Ázerbaıjannyń ekologııa jáne tabıǵı resýrstar mınıstriniń orynbasary Raýf Gadjıev málim etti.

Búginde Kaspıı teńizinde bekire balyqtarynyń jaǵdaıy alańdatyp otyrǵanyna toqtalǵan ol, Kaspıı jaǵalaýy elderiniń barlyq kúsh-jigerine qaramastan, bul máselede tıisti sheshim jasaý kerektigin jetkizdi. Sondyqtan da endi vedomstvoaralyq komıssııa úkimetaralyq deńgeıge ózgeretin bolady.

Osy arqyly kelesi kezdesý jańarǵan quramda uıymdastyrylady. Onyń quramyna balyq sharýashylyǵy qurylymdary, sonymen qatar Kaspıı teńizi sý bıoresýrstaryn saqtaý turǵysynda basqa da memlekettik qurylymdar enedi.

«Kaspıı jaǵalaýy elderiniń úshinshi sammıtinde Qazaqstan Prezıdenti Nursultan Nazarbaev barlyq memleketterdiń kommertsııalyq maqsatta bekire balyqtaryn aýlaýǵa moratorıı jarııalaý sheshimine kelýi bastamasyn kóterdi. Jańa komıssııa osy moratorııdiń tetigin ázirleıdi. Meniń oıymsha, barsha Kaspıı jaǵalaýy elderi osy qujatqa qol qoıady, - dedi R.Gadjıev.

Onyń sózine qaraǵanda, taraptar atalǵan ýaǵdalastyqqa qol qoıǵan joq, alaıda 2010 jyldan beri Qazaqstan, Ázerbaıjan, Iran, Túrkimenstan jáne Reseı bekire tuqymdas balyqtardy aýlaýdy doǵardy.