Jańa týǵan sábı de koronavırýspen aýrýy múmkin – elimizdiń bas pedıatry

NUR-SULTAN. QazAqparat – Jańa týǵan sábı de koronavırýspen aýrýy múmkin. Bul týraly QR Densaýlyq saqtaý mınıstrliginiń bas pedıatry, medıtsına ǵylymdarynyń doktory Rıza Boranbaeva aıtty, dep habarlaıdy QazAqparat tilshisi.

«Eresekterge qaraǵanda balalar koronavırýs ınfektsııasymen sırek aýyrady. Jalpy, balalarda aýrý sımptomsyz nemese jeńil formada ótedi. Degenmen Covid-19-dyń balalar arasynda aýyr ótetin jaǵdaılaryn da joqqa shyǵarýǵa bolmaıdy. Tipti, jańa týǵan sábı de aýyryp qalýy múmkin. 2021 jyldyń 1 qańtarynan beri Covid-19-dyń naqtylanǵan dıagnozymen 16 245 bala, onyń ishinde 34 jańa týǵan sábı tirkeldi. 13 985 patsıent emdelip shyqty. Bul shamamen 80 paıyzdy quraıdy», - dedi ol Ortalyq kommýnıkatsııalar qyzmetindegi baspasóz máslıhaty barysynda.

Onyń atap ótýinshe, koronavırýspen aýyrǵan balalardyń 90 paıyzynda ınfektsııa sımptomsyz formada ótken. Balalardyń 10 paıyzy ortasha aýyr jáne 0,1 paıyzy aýyr formada aýyrǵan.

«Aýyrǵandardyń arasynda tek 58 balaǵa vırýstyq ókpe qabynýy dıagnozy qoıyldy. Vırýstyq ókpe qabynýy balalar arasynda ádette óte sırek kezdesedi. Elimizde balalarǵa vaktsına salynbaıdy. Onyń ústine koronavırýsty emdeıtin resmı dárilik zat ta joq. Sondyqtan olardyń qorǵaýdyń mańyzy quraly - epıdemııaǵa qarsy is-sharalardy saqtaý. Vırýsty aýa-tamshy jolymen taralady. Osyǵan baılanysty balaǵa jótelgende nemese túshkirgende aýyzdy oramalmen jabýdy, qoldy únemi jýýdy, aýyzdy, muryndy jáne kózdi ustamaýdy úıretý kerek»,- dedi Rıza Boranbaeva.