Jańa tehnologııalardy paıdalaný arqyly jol qurylysynda energııany - 25, jalpy shyǵyndy 5 paıyzǵa azaıtýǵa múmkindik týady - A. Jumaǵalıev

ASTANA. 26 jeltoqsan. QazAqparat - Bıyl QR Kólik jáne kommýnıkatsııa mınıstrligi jol qurylysynda jańa tehnologııalardy belsendi túrde engizip otyrdy. Bul týraly búgin Ortalyq kommýnıkatsııalar qyzmetinde ótken brıfıngte QR Kólik jáne kommýnıkatsııa mınıstri Asqar Jumaǵalıev aıtty.

Mınıstrdiń aıtýynsha, «Mıkrosıýrfeısıng» jol jamylǵysyn qoldaný jóninde alǵash ret tájirıbelik jumystar atqarylǵan. Bul budyrly-syrtqy óńdeý (BSÓ) tehnologııasyn almastyryp, joldyq jóndeýaralyq merzimin 2-3 jylǵa uzartatyn bolady.

«Sonymen qatar, monolıtti temirbeton kópirlerin de sala bastadyq, ol qurylys qunyn 30 paıyzǵa arzandatady. Kelesi jyldan bastap jyly asfalt-beton qospalaryn paıdalanýdy tájirıbelik maqsatta qoldanatyn bolamyz», - dep atap ótti ol.

Mınıstrdiń málimetinshe, sol arqyly energııa shyǵynyn 25 paıyzǵa qysqartyp, jol qurylysy shyǵyndaryn 5 paıyzǵa azaıtýǵa múmkindik týady.

«Qazirgi ýaqytta «QazjolǴZI» AQ ınnovatsııalyq materıaldar men tehnologııalar qoldanylatyn 40 tájirıbelik monıtorıng júrgizýde. Zertteý jumystarynyń nátıjesi boıynsha olardyń qurylysta paıdalaný múmkindigi anyqtalady», - dedi A. Jumaǵalıev.