Jańa sý qoımalary qaı oblystarda salynady

<p>ASTANA. KAZINFORM &ndash; Prezıdent tapsyrmasymen 2,5 mlrd tekshe metrge deıin sý jınaı alatyn 20 jańa sý qoımasyn salý jumystary júrgizilýde. Bul týraly Sý resýrstary jáne ırrıgatsııa mınıstrligi habarlady.</p>

Birinshi kezeńde Aqmola, Batys Qazaqstan, Jambyl, Qyzylorda, Túrkistan men Jetisý oblystarynda sý qoımalaryn salý josparlanǵan.

«Búginde Túrkistan oblysynda Keńsaı-Qosqorǵan-2 sý qoımasy paıdalanýǵa berildi. Báıdibek aýdanynda Báıdibek ata sý qoımasynyń, Tóle bı aýdanynda Qaraqýys sý qoımasynyń qurylysy bastaldy. Jańa sý qoımalary Qazaqstannyń ońtústigindegi qurǵaqshylyqpen kúresýge kómektesedi, sharýalardy sýdyń qajetti kólemimen qamtamasyz etýge jáne elimizdiń kórshi memleketterdiń sý resýrstaryna táýeldiligin 25%-ǵa azaıtýǵa múmkindik beredi», - dedi mınıstrliktiń resmı ókili Móldir Ábdýalıeva Ortalyq kommýnıkatsııalar qyzmetinde.

Budan bólek, jańa sý qoımalaryn qoldanysqa berý sýarmaly jerlerdiń aýdanyn 250 myń gektarǵa deıin ulǵaıtýǵa jáne 137 myń turǵyny bar 70 aýyldyq eldi mekendi sý basý qaýpin azaıtýǵa múmkindik beredi.

Sondaı-aq, elimizde jalpy kólemi 1,9 mlrd tekshe metr bolatyn qoldanystaǵy 15 sý qoımasyn qaıta jańartý josparlanyp otyr. Bıyl Aqtóbe, Batys Qazaqstan, Jambyl, Qostanaı, Túrkistan oblystary men Astana qalasyndaǵy alty nysanda rekonstrýktsııa jumystary bastalady.