Jańa salynǵan úılerge ınternet tartý mindeti zań júzinde bekitilýi múmkin

NUR-SULTAN. QazAqparat – Tsıfrlyq damý, ınnovatsııalar jáne aeroǵarysh ónerkásibi mınıstrligi halyqty ınternetpen qamtamasyz etý úshin birshama zańnamalyq ózgeristerdi daıyndap jatyr, dep habarlaıdy QazAqparat tilshisi.

«Internet, gaz, elektroenergııa, sý turǵyndar úshin birinshi qajetti zattar. Sol sebepten biz biraz zańnamalyq ózgerister jasaýdamyz. Atap aıtqanda kondomınımýmderge baılanys nysandaryn alyp tastaýǵa tyıym salý kerek. Jańa úılerdi paıdalanýǵa berý aldynda mindetti túrde ony optıka jelisimen qamtamasyz etken abzal. Sondaı-aq ınternettiń jyldamdyǵy týraly sapa talaptaryn bekitken jón», - dedi Baǵdat Mýsın Úkimet otyrysynda.

Onyń aıtýynsha jalpy bul rette memlekettik organnyń róli kúsheıtiledi.

«Internet sapasyna halyqtyń baqylaýyn júrgizý úshin Bailanys.bar qyzmeti iske qosyldy. Qazirgi ýaqytta ony 50 myńnan astam adam qoldanýda. Sonymen qatar, memlekettik baqylaý maqsatynda 17 jyljymaly ólsheý keshenderi satyp alynyp jatyr. Sonyń nátıjesinde halyqtyq jáne memlekettik baqylaýdyń derekteri bir júıege jınalyp, ary qaraı operatorlarmen jumys isteý múmkindigine ıe bolamyz», - dedi ol.