Jańa Salyq kodeksinde alkogol ónimderimen aınalysatyn kásipkerlerge jeńildikter qarastyrylǵan

ASTANA. QazAqparat - Jańa Salyq kodeksiniń jobasynda alkogol ónimderimen aınalysatyn kásipkerlerge jeńildikter qarastyrylǵan. Bul týraly búgin Úkimet otyrysynda QR Qarjy mınıstri Baqyt Sultanov aıtyp ótti, dep habarlaıdy «QazAqparat» HAA tilshisi.

Mınıstr Salyq kodeksine engizilip jatqan ózgerister kásipkerlerge tıimdi ekenin jetkizdi.

«Qazirgi ýaqytta alkogol ónimin lıtsenzııalaý protsesi kóptegen narazylyqtar men daýlardyń týyndaýyna sebep bolyp jatady. Salyq kodeksiniń jańa jobasynda lıtsenzııalyq baqylaýdy yryqtandyrý (lıberalızatsııa) kózdeledi. Demek, lıtsenzııa aldynda tekserýler júrgizilmeıdi. Táýekelderdi basqarý júıesi negizinde lıtsenzııalaýdan keıingi baqylaýǵa kóshý boljanyp otyr», - dedi Baqyt Sultanov.

Mınıstr sondaı-aq, qazirgi qoldanystaǵy kodeks normalarynyń repressıvtiligin tómendetý maqsatynda korporatıvtik tabys salyǵy boıynsha avanstyq tólemderdi tómendetkeni úshin ákimshilik aıyppul mólsheri 40-tan 20 protsentke deıin azaıtylǵanyn atap ótti. Buǵan qosa balamaly tekserýler boıynsha aýdıtorlyq kompanııalardy lıtsenzııasynan aıyrý jónindegi norma alynyp tastalǵan.

«Qorytyndylaı kele, ákimshilendirýdi jetildirý boıynsha barlyq jańalyqtar bıznestiń damýyna sózsiz oń yqpal etetinin jáne salyq organdary jumystarynyń fıskaldyq ádisterinen bıznespen áriptestik qatynastarǵa kóshýdi qamtamasyz etetinin atap ótkim keledi», - dep túıdi mınıstr.