Jańa salyq kodeksi: tólemder sany 77-ge azaıyp, 6 alym túri qysqartylmaq

<p>ASTANA. KAZINFORM &ndash; Jańa salyq kodeksiniń jobasynda mańyzdy fıskaldyq mańyzy joq tólemderdi alyp tastaý, keıbireýlerin biriktirý qarastyrylǵan. Bul týraly QR UEM Salyq jáne keden saıasaty departamentiniń dırektory Erlan Saǵynaev málimdedi.&nbsp;</p>

«Jańa Salyq kodeksinde salyqtyq ákimshilendirýge basa nazar aýdarylady. Ákimshilendirýdiń servıstik modeli engizilýde. Salyq eseptiligi qysqarady. Baqylaý tsıfrlandyrylady. Jańa Salyq kodeksi jobasynyń negizgi baǵyttaryna toqtalar bolsaq, mańyzdy fıskaldyq mańyzy joq tólemder alynyp tastalady, keıbireýleri biriktiriledi. Olardyń sany 20%-ǵa qysqarady», - dedi Erlan Saǵynaev.

Spıkerdiń aıtýynsha, 12 salyqtyń ornyna 11 salyq bolady. Biryńǵaı jer salyǵyn (BJS) jeke tabys salyǵyna aýystyrý usynylady.

2 tólemdi (10-nan) alyp tastaý usynylady: jarnamany ornalastyrǵany jáne lıtsenzııalardy paıdalanǵany úshin tólemder.

3 tólemdi biriktirý usynylady: sý resýrstaryn paıdalaný úshin, ormandy paıdalaný úshin jáne janýarlar álemin paıdalaný úshin. Úsheýi biriktirilip, bir ǵana — tabıǵı resýrstardy paıdalaný tólemi bolady. 

«Jalpy, tólem mólsherlemeleriniń sany 77-ge qysqarady. Alymdardyń 6 túrin qysqartý usynylady. Olar boıynsha mólsherlemeleriniń 34 túri alynyp tastalady. Sondaı-aq memlekettik bajdardyń 5 túri alynyp tastalady, olar boıynsha mólsherlemeler 51-ge qysqartylady», - dedi departament dırektory.

Qazirgi ýaqytta joba Qazaqstan Respýblıkasy Parlamenti Májilisiniń qaraýynda. 

Aıta keteıik, búgin Astanada Ulttyq kásipkerler palatasynyń sezdaldy jıyny ótip jatyr. Onda búkil óńirdiń jáne 200-deı bıznes qaýymdastyqtyń atynan 400-deı ókil qatysyp jatyr. 

Jıynda sońǵy birneshe aıda kásipkerlerden kelip túsken suraqtar talqylanýda. 

Buǵan deıin Prezıdent jańa Salyq kodeksin qabyldaý merzimin kelesi jylǵa aýystyrýǵa bolatynyn aıtqan edi.