Jańa Parlamentpen tyń ózgerister bolatyndyǵyn kútemiz – Marat Báshimov

NUR-SULTAN. QazAqparat – Azamattarymyz jańa Parlamentpen birge qarapaıym adamdardyń ómirinde jańa ózgerister bolatyndyǵyn kútedi. Mundaı pikirdi Eýropalyq quqyq jáne adam quqyqtary ınstıtýtynyń dırektory Marat Báshimov bildirdi, dep habarlaıdy QazAqparat tilshisi.

«Prezıdent Qasym-Jomart Toqaev bul saılaýlar demokratııamyzdyń alǵa qaraı damý qadamy bolýy tıistigin aıtty. Árbir saılaý – bul azamattyq kemeldenýge arnalǵa baıypty emtıhan. Májiliske qajetti 7 paıyzdyq tosqaýyldy eńsergen 3 partııa ótti. Qazaqstanda saılaýǵa kelýdiń aldyn ala qorytyndysy – 63,3 paıyz. Bul – barynsha joǵary kórsetkish. Máselen, Polshada sońǵy saılaýda 30 paıyzdan sál astam saılaýshy qatysqan. Azamattar joǵary azamattyq jaýapkershilik kórsetti, saılaý mádenıeti joǵarylady. Naqty nátıje saılaýdyń sońǵy qorytyndysy shyǵarylǵannan keıin bolady. Exit poll alǵashqy nátıjeleri de bar», - dep jazdy Marat Báshimov Facebook-paraqshasynda.

Instıtýt dırektorynyń atap ótýinshe, Exit poll álemdik áleýmettik tájirıbede qoldanylatyn protsedýra sanalady. Onyń barysynda saılaý ýchaskesiniń shyǵa berisinde daýys bergen adamdar arasynda saýalnama alynady. «Qoǵamdyq pikir» zertteý ınstıtýtynyń exit poll nátıjesinde respondentterdiń 5,75 paıyzy «Aýyl» halyqtyq-demokratııalyq patrıottyq partııasyna, 71,97 paıyzy «Nur Otan» partııasyna, 3,07 paıyzy «ADAL» saıası partııasyna, 10,18 paıyzy Qazaqstannyń «Aq jol» demokratııalyq partııasyna, 9,03 paıyzy «Qazaqstannyń Halyq partııasyna» daýys bergen. Suhbat formatynda halyqaralyq standartty ádistemege saı ótkizilgen exit poll barysynda respondentterge «Parlamenttik saılaýda siz qaı partııaǵa daýys berdińiz?» degen bir ǵana suraq qoıylǵan.

«Saılaý ýchaskelerinde daýys berý sanıtarlyq-epıdemıologııalyq talaptardy saqtaı otyryp ótkizildi. Saılaý protsesin uıymdastyrý laıyqty deńgeıde boldy. Jastar kóp qatysty. Saılaý barysynda-aq Memleket basshysy Qasym-Jomart Toqaev halyqtyń azamattyq belsendiligi óte joǵary ekendigin atap ótti. Kandıdattar kóp jáne olardyń barlyǵyna teńdeı jaǵdaı jasaldy. Saılaý joǵary deńgeıde, zańnamaǵa saı boldy jáne aıaqtaldy. Qoǵam damýynyń jańa kezeńi bastalady. Azamattarymyz jańa Parlamentpen birge qoǵamdyq, áleýmettik ómirde, ózge de salalalarda, qarapaıym adamdardyń ómirinde jańa ózgerister bolady dep kútedi», - dedi ol.