Jańa, ónimdi jumys oryndaryn asha alǵan memleket qana jeńiske jetedi - N. Nazarbaev

ASTANA. QazAqparat - Jańa ónimdi jumys oryndaryn asha alǵan memleket qana jeńiske jetedi. Búgin Astanadaǵy Táýelsizdik saraıynda ótip jatqan Indýstrııalandyrý kúni aıasyndaǵy jıyn barysynda sóz sóılegen Elbasy Nursultan Nazarbaev osylaı málimdedi.

Memleket basshysynyń aıtýynsha, HHІ ǵasyrdaǵy júıeli problemalardyń biri - jumyssyzdyq máselesiniń órshýimen baılanysty. Bul negizinen halyqtar sanynyń artýynan oryn alyp otyr.

«Jer júzinde 7 mlrd. adam turatynyn bilemiz, al sonyń ishinde 15 jastan joǵary, jumysqa qabiletti adamdar sany 5 mlrd. adamdy quraıdy. Al Jer betinde ashylyp jatqan tek 1,5 mlrd. jumys orny bar. Endeshe qalǵany ýaqytsha jumys oryndarynda júr nemese jumys izdep júr degen sóz. Búkil álem qazir eń birinshi kezekte jumyssyzdyqty joıǵysy keledi. Sarapshylardyń baǵalaýy boıynsha, jer betindegi adamdardyń basym kópshiligi laıyqty jumystyń, laıyqty jalaqynyń bolýyn tileıdi eken», - dedi N. Nazarbaev.

Bul rette Elbasy jaqsy jumys mıllıondaǵan adamdar ómirindegi áleýmettik lıft bolyp tabylatynyn atap ótti. «Jańa, ónimdi jumys oryndaryn kóbirek asha alǵan memleket qana jeńiske jetedi», - dedi N. Nazarbaev.