Jańa oqý jylynda 1 mln oqýshy tegin ystyq tamaq ishedi

NUR-SULTAN. QazAqparat – Jańa oqý jylynda 1 mln oqýshy tegin ystyq tamaqpen qamtylady. Bul týraly Oqý-aǵartý vıtse-mınıstri Ǵanı Beısembaev aıtty, dep habarlaıdy QazAqparat tilshisi.

«Ystyq tamaqpen qamtamasyz etý baǵytynda jergilikti atqarýshy organdardyń boljamdy aqparatyna sáıkes, 1-11 synyptarda 3,3 mln-nan astam oqýshy úshin 6 068 mektepte, 48 myńnan astam bala úshin 441 mektepte býfettik tamaqtaný uıymdastyrylady. Jańa oqý jylynda tegin ystyq tamaqpen 1-11 synyp oqýshylarynyń 30 paıyzyn, ıaǵnı 1 mln-ǵa tarta oqýshyny, onyń ishinde áleýmettik osal otbasylardan shyqqan 442,1 myń oqýshyny qamtamasyz etý josparlanǵan», - dedi ol Ortalyq kommýnıkatsııalar qyzmetindegi baspasóz máslıhatynda.

Vıtse-mınıstrdiń atap ótýinshe, 8 óńirde ákimdikterdiń bastamasymen máslıhattardyń sheshimine sáıkes, 1-4 synyptardyń 52 paıyzy nemese 723 872 oqýshy tegin tamaqpen qamtamasyz etiledi. Olar: Atyraý, Batys Qazaqstan, Qaraǵandy, Ulytaý, Pavlodar oblystary, Nur-Sultan, Shymkent jáne Almaty qalalary.

«Eki óńirde, atap aıtqanda Aqmola jáne Mańǵystaý oblystarynda 1 synyp oqýshylary tegin tamaqpen qamtamasyz etiledi», - dedi Ǵanı Beısembaev.