Jańa oqý jylyna deıin barlyq mektep oqýlyqpen qamtamasyz etiledi

ASTANA. QazAqparat - Jańa oqý jylyna deıin barlyq mektep oqýlyqpen qamtamasyz etiledi. Bul týraly búgin Aqordada QR Memlekettik hatshysy Gúlshara Ábdiqalyqovanyń 2015-2016 jańa oqý jylynyń qarsańynda elimizdiń bilim berý júıesiniń qyzmetkerlerimen kezdesýi aldynda Bilim jáne ǵylym mınıstri Aslan Sárinjipov málim etti.

«Oqýlyqpen qamtamasyz etý máselesine toqtalar bolsa, biz qańtar aıynan bastap óńirlermen birlese otyryp, naqty keste, jospar qurdyq. Barlyq oblystary jumystar júrgizilýde. Qazirdiń ózinde óńirlerdiń basym bóligi 100 paıyz aǵymdaǵy jyly aýystyrylatyn 4 synyp oqýlyqtarymen qamtamasyz etildi», - dedi mınıstr.

A.Sárinjipovtiń aıtýynsha, mektepterdi oqýlyqtarmen qamtamasyz etý úshin bıýdjetten 13 mlrd. teńge qarjy bólinip, ıgerilgen. «Qazirgi ýaqytta mektepterge oqýlyq jetkizý jumystary júrgizilýde. Kitap jetkizilmegen 1-2 aýdan ǵana qaldy. Biz bul máseleni baqylaýda ustap otyrmyz. 28 tamyzǵa deıin shalǵaıdaǵy aýdandardyń barlyǵyna da oqýlyqtar jetkiziledi», - dedi ol.