Jańa oqý jylyn uıymdastyrýdyń 4 nusqasy qarastyrylýda - Qaraǵandy oblysy

QARAǴANDY. QazAqparat – Qaraǵandy oblysynda bilim berý qyzmetkerlerin koronavırýsqa qarsy vaktsınatsııalaý aıaqtalýǵa jaqyn, dep habarlaıdy QazAqparat tilshisi.

Bilim basqarmasynyń basshysy Gúlsim Qojahmetova onlaın rejımde ótken apparattyq keńeste jańa oqý jylyna daıyndyq týraly baıandady.

Onyń aıtýynsha, jańa oqý úderisin uıymdastyrý boıynsha oqytýdyń tórt nusqasy qarastyrylýda:

- qashyqtyqtan;

- aralas, onda sabaqtardyń 80%-y shtattyq formatta jáne 20%-y qashyqtyqtan ótkiziledi;

- aralas, onda shtattyq formatta 1–4 synyptar, 5–11 synyptar oqıdy – 3 kúnnen oflaın jáne onlaın;

- shtattyq oqytýǵa tolyq kóshý.

Sheshim epıdemıologııalyq jaǵdaıǵa baılanysty qabyldanady.

«Búgingi tańda bilim berý uıymdarynyń 39 240 pedagogy men qyzmetkeri nemese 92,6% koronavırýsqa qarsy vaktsına aldy. Sondaı-aq, 18 jastan asqan kolledjderdiń 4 389 stýdenti ekpe jasatty, bul 55,6% quraıdy. Barlyq uıymdarda pedagogtar men qyzmetkerlerdiń, sondaı-aq ata-analardyń mártebesin tekserý úshin Ashyq júıesi ornatylǵan. Barlyq bilim berý uıymdary men stýdenttik jataqhanalar tolyq kólemde sanıtarlyq quraldarmen qamtamasyz etilgen», – dedi Gúlsim Qojahmetova.

Mekemelerdiń jańa oqý jylyna daıyndyǵyn tekserý sanıtarlyq-epıdemıologııalyq baqylaý departamentimen birlesip júrgiziledi.

Sondaı-aq, vedomstvo basshysy balalar úshin qaýipsiz orta qurý týraly baıandady. Bilim berý mekemeleriniń jartysynan kóbinde dabyl túımeleri paıda boldy. Sondaı-aq, daýystyq eskertý júıelerin ornatylýda. Atalmysh júıemen oqý jylynyń basynda barlyq mektepter men kolledjder jabdyqtalady. Sonymen qatar, 92 bilim berý uıymynyń kireberisterinde týrnıketter ornatyldy. Bul jumys jalǵasýda.

Basqarma basshysynyń málimetinshe, bıyl 166 bilim berý nysany: 120 mektepte, 26 balabaqshada, 19 kolledjde jáne bir balalar úıinde jóndeý jumystary júrgizilýde.

Oblys ákimi Jeńis Qasymbek barlyq jóndeý jumystaryn ýaqytynda aıaqtap, onyń sapasyn qadaǵalaýdy tapsyrdy.

«Bilim basqarmasy sanepıdbaqylaý departamentimen birlesip, oqýshylar men stýdentterdi dástúrli júıede oqytý úshin jaǵdaı jasaý jóninde sharalar qabyldaýy qajet. Qorǵanys quraldarymen jabdyqtaýdy tolyq kólemde qamtamasyz etý kerek. Bilim berý uıymdarynyń pedagogtary men personalyna vaktsınatsııa júrgizý jalǵastyrylýy tıis. Sonymen qatar, kompıýterler men oqýlyqtarmen qamtamasyz etý baqylaýda qalady. Az qamtylǵan mektep oqýshylaryn áleýmettik qoldaýǵa erekshe nazar aýdarý kerek», – dedi óńir basshysy.