Jańa mektepterdiń qazaq nemese aralas tilde bolýy halyq qajettiligine baılanysty - Erbolat Dosaev

ALMATY. QazAqparat – Almatyda jańadan ashylatyn mektepterde oqý tili jergilikti halyqtyń qajettilikterine baılanysty tańdalady. Bul týraly Erbolat Dosaev Naýryzbaı aýdany turǵyndarymen kezdesýi barysynda málim etti, dep habarlaıdy QazAqparat tilshisi.

«Jańadan kóp mektep ashylyp jatyr, biraq olardyń barlyǵy tek qazaq tildi. Aralas mektepter joq, al bizdiń №157 mektepte bala sany normadan asyp ketken», - dep aýdany turǵyny másele kóterdi.

Shahar basshysy munyń sebebi suranysqa baılanysty ekenin túsindirdi.

«Naýryzbaı aýdanynda ashylǵan jańa mektepterdiń kópshiligi qazaq tilinde oqytady. Bul ótken jyldyń basynda osy aýdanda tapshylyǵy baıqalǵan 7,5 myń mektep ornynyń ishinde qazaq tilinde oqytýǵa ótinimderdiń kóp bolǵanyna baılanysty. Sondyqtan, ótinishter qanaǵattandyryldy. Biz salǵaly otyrǵan jańa mektepter, onyń ishinde «Jaıly mektep» ulttyq jobasy aıasynda aýdandyq bilim basqarmalarynyń qaraýyndaǵy ótinimder sanyna qaraı ashylatyn bolady. Memleket basshysy bilim berýge erekshe kóńil bóledi. Bizde naqty josparlar bar: 2025 jyldyń sońyna deıin mektepterdiń 30%-yn bir aýysymǵa aýystyrýǵa umtylamyz. Buǵan múmkindikter bar», - dedi Erbolat Dosaev.

Sondaı-aq, qalalyq bilim basqarmasynyń basshysy Lázzat Jylqybaeva megapolıste qazaq mektepterine suranys joǵary ekenin basa aıtty.

«Jańadan ashylǵan №207 mektep 1 200 orynǵa eseptelgen. Qazaq synyptaryna 2 400 bala keldi, al orys synyptaryna kelgen bala sany 100-den aspaıdy. Osyǵan baılanysty №157 mektepte orys tilinde oqıtyn osy aýdan turǵyndary úshin oqýshylar tasymalyn uıymdastyrdyq. Eń aldymen, ata-analardyń qajettilikterin eskeremiz. Keıingi ashylǵan segiz mekteptiń ekeýi – aralas», - dep túsindirdi basqarma basshysy.