Jańa mektep salarda talshyqty-optıkalyq baılanys ornatý talap etiledi
«Mektepterdi sapaly ınternetpen qamtamasyz etý úshin mınıstrlik kelesi sharalardy usynady. Birinshi, ákimdikter 2023 jyldyń tamyzyna deıin Halyqaralyq elektrbaılanys talabyna sáıkes, 2 810 mekteptegi Internet jyldamdyǵyn arttyrý jáne eldimeken ishindegi 266 mektepke deıin talshyqty optıka jelisin qurýy qajet. Ekinshi, mınıstrlik baılanys operatorlarymen birlesip, 2024 jyldyń sońyna deıin 2 764 mekteptegi transmıssııalardy talshyqty optıka nemese radıorelelik baılanys jelilerine aýystyryp, shalǵaıdaǵy 574 mektepti spýtnıktik baılanyspen qamtamasyz etedi», - dedi B. Mýsın Úkimet otyrysynda.
Sondaı-aq, «Jaıly mektep» ulttyq jobasy aıasynda jańa mektepterge qoıylatyn basty talap – talshyqty-optıkalyq baılanys ornatý bolmaq.
«Búgingi tańda mektepterdiń kópshiligi ınternetke qosylǵan. Alaıda, sol mektepter ishinde lokaldy nemese Wi-Fi jelisiniń bolmaýynan oqýshylar Internetke qosyla almaı zardap shegýde. Keı mektepterde tek qana dırektor, esepshi jáne sanaýly kabınette ınternet bolady, al tutas mektep tolyqqandy ınternetpen qamtylmaǵan. Sol sebepti, mınıstrlik mektepterde bul máseleni lokaldy jeli men Wi-Fi núktelerin uıymdastyrý arqyly sheshý tásilin usynýda Internetke kirý núktesi 200 qurylǵynyń jumysyn bir ýaqytta qamtamasyz etip, barlyq oqý bólmeleri men zerthanalarda jáne mektep aýlasyna deıin Wi-Fi jelisin qamtýy tıis», - dedi B. Mýsın.
Sonymen birge, Tsıfrlyq damý mınıstrligi mektepter úshin baılanys operatorlarynyń biryńǵaı baılanys ortalyǵyn qurýdy qolǵa almaq.
«Al ákimdikter 2023 jyldyń sońyna deıin ár mektep ishinden lokaldy jeliniń bolýyn qamtamasyz etýi qajet», - dedi Baǵdat Mýsın.