Jańa Qurylys kodeksi: Josparly ınspektsııalaý tetigi engizilmek
«Jedel den qoıý sharasyn engizý — bul qurylysty baqylaýdyń jańa nysany, ol anyqtalǵan zań buzýshylyqtarǵa jedel den qoıýdan turady. Bul mehanızm memlekettik sáýlet-qurylys baqylaý organdaryna zań buzýshylyqtarǵa ýaqtyly den qoıýǵa múmkindik beredi. Óreskel zań buzýshylyqtar anyqtalǵan kezde ol joıylǵanǵa deıin qurylysty toqtata turý múmkindigi bolady. Bul rette, tekserý sýbektisine barýdan basqa, atalǵan shara aqparattyq júıeler monıtorınginiń nátıjeleri boıynsha da qoldanylatyn bolady. Jalpy, bul mehanızm qurylys sapasyn arttyrýǵa múmkindik beredi jáne qurylys kompanııalarynyń jumysyna sapaly baqylaý júrgizýdi qamtamasyz etedi dep sanaımyz», — dedi Tımýr Qaraǵoıshın.
Onyń atap ótýinshe, «Josparly ınspektsııalaý» tetigin engiziledi. Salynǵan obektilerdi qabyldaýǵa memleket atynan Memlekettik sáýlet-qurylys baqylaý jáne Tótenshe jaǵdaılar organdary qatysady.
«Josparly ınspektsııalaý qurylysqa tapsyrys berýshiniń ózi jasaǵan jáne qurylys-montajdaý jumystarynyń bastalǵany týraly habarlamamen birge berilgen keste boıynsha memleket tarapynan tekserýdi júzege asyrýdy bildiredi. Inspektsııalaý jospary bolǵan kezde memlekettik sáýlet-qurylys baqylaý organdary ınspektorlarynyń qurylys nysanyna tekseriske shyǵýy barlyq kezeń ishinde kestege sáıkes júzege asyrylatyn bolady. Bul rette memlekettik sáýlet-qurylys baqylaý organdary oryndalǵan jumystardyń sapasy týraly qorytyndyny qurylys nysanyna shyqpaı-aq kelisedi. Inspektsııalaý jospary bolmaǵan kezde oryndalǵan jumystardyń sapasy týraly qorytyndyny kelisý rásimi qurylys nysanyna baryp jáne júrgizilgen qurylys-montajdaý jumystarynyń sapasyn tekserý boıynsha barlyq qajetti sharany júrgize otyryp júzege asyrylady», — dedi vıtse-mınıstr.