Jańa Qazaqstanǵa qol jetkizý úshin árbir azamat óz salasynda sapaly eńbek etýge tıis – Senat tóraǵasy
«Suhbatta qoǵamǵa mańyzdy ıdeologııalyq messedjder de nazardan tys qalǵan joq. Biz búginde Jańa Qazaqstandy quramyz degen jospardyń aıasyna toptastyq. Árıne, bul jospar ózdiginen júzege aspaıtyny túsinikti. Jańa Qazaqstannyń qozǵaýshy kúshi – bizdiń azamattarymyz, olardyń Otanǵa degen adaldyǵy, eńbekqorlyǵy men biliktiligi. Jańa Qazaqstan – jańa mindet, ortaq murat. Oǵan qol jetkizý úshin árbir azamat óz salasynda sapaly eńbek etýge tıis», - dep jazdy Máýlen Áshimbaev Facebook paraqshasynda.
Senat basshysynyń málimdeýinshe, qazir elimizdiń táýelsizdigi men memlekettiligin saqtap, ári qaraı nyǵaıtý – eń basty mindet.
«Prezıdentimiz aıtqandaı, qazaqstandyqtardyń Qazaqstannan basqa Otany joq. Osy ortaq Otanymyzdy odan ári damytý jáne jańartý jolynda barshamyzdyń judyryqtaı jumylyp áreket etýimiz asa mańyzdy», - deıdi ol.
Sondaı-aq, M. Áshimbaev jańa Qazaqstandy el bolyp, birge qurýǵa shaqyrdy.
«Qurmetti dostar, sondyqtan eldiń bereke-birligin saqtap, sabyrlyq pen jaýapkershilikke taban tirep, baısaldylyq tanytyp, bar máseleni baıyppen sheshýge kúsh jumsaýymyz qajet. Osy jolda bárimiz Prezıdentimizdiń saıasatyn qoldap, Jańa Qazaqstandy qurýǵa belsendi atsalysaıyq», - dedi Senat tóraǵasy.