Jańa Qazaqstandyq patrıotızm - jahandaný úderisterine tótep berýdiń sara joly - Qazaqstan káristeri qaýymdastyǵynyń vıtse-prezıdenti Georgıı Kan

ALMATY. QazAqparat- Qazaqstan halqy Assambleıasynyń 18 sáýir kúni bolatyn HHІ sessııasy kúrdeli kezeńde óteıin dep otyr. Álemde Jahandaný úderisteri júrýde. Osy turǵydan alyp qaraǵanda, ulttyq erekshelikti, salt-dástúrdi qalaı saqtap qalýǵa bolady? Qazaqstan Halqy Assambleıasyna júkteler mindetter qandaı? Osy suraqtarǵa jaýap alý úshin QazAqparat tilshisi Qazaqstan káristeri qaýymdastyǵynyń vıtse-prezıdenti, Qazaqstan halqy Assambleıasy ǵylymı-saraptamalyq keńesiniń múshesi Georgıı Vasılevıch Kan myrzany áńgimege tartqan edi.

- Georgıı Vasılevıch, ótken jyly Elbasy Qazaqstan halqy Assambleıasynyń 2020 jylǵa arnalan damý tujyrymdamasyna qol qoıdy. Assambleıaǵa qandaı jańa mindetter júkteldi?

- Tujyrymdama qabyldandy. Bizdiń maqsatymyz - ómirdiń barlyq salasyn «2050 Strategııasyna» sáıkestendirý! Álemniń joǵary damyǵan 30 eliniń qataryna ený! Árıne, bul jerde ıdeologııalyq jáne áleýmettik blok qamtylady. Qazaqstan halqy Assambleıasyna úlken jaýapkershilik júktelip otyr. Tujyrymdamany qabyldaýǵa barlyq etnomádenı birlestikter atsalysty. Bul mańyzdy qujat boıynsha Qazaqstan halqy Assambleıasy qoǵamdy biriktiretin, jalpyazamattyq alańǵa aınalýy tıis. Ol Qazaqstan halyqtaryn biriktirýge, demokratııany, mádenıetter men órkenıettik baılanystardy damytýǵa baǵyttalǵan. ıAǵnı, qoǵamdy jańa álemge, jańa ınnovatsııalyq ekonomıkaǵa daıyndaýy tıis.

- Osy jerde «Jańa qazaqstandyq patrıotızm» uǵymynyń ereksheligine toqtalsańyz...

- Men ǵalym retinde osy salada kóp izdendim. Qazir baıqasańyz, álemde «Jańa amerıkalyq patrıotızm», «Jańa eýropalyq patrıotızm», «Jańa reseılik patrıotızm» uǵymdary aýyzǵa alynyp jatyr. Álem ózgerdi. ıAǵnı búkil álem jańa patrıotızmdi, sonyń negizin izdestirýde. Jańa amerıkalyq patrıotızm Iraktaǵy soǵysqa, Snoýdenge baılanysty belsendi túrde talqylanýda. Eýropa elderi birigip jatyr. Sonda, mysaly germanııalyq, polshalyq parıotızm - ol sonda qalaı, ulttyq patrıotızm be álde eýropalyq patrıotızm bolyp sanala ma? Bul jaǵdaıda jańa qazaqstandyq patrıotızm bul búkil álemde bolyp jatqan damý úderisterinen týyndap otyr. Jańa qazaqstandyq patrıotızm - eski keńestik patrıotızm uǵymynan bas tartý. Jahandaný úderisterine tótep berý. Bul biz úshin úlken syn. Oǵan qalaı tótep berý kerek? Etnıkalyq jáne jalpy azamattyq ustanymdardy qalaı úılestirý kerek? Árıne, patrıotızm - qaı zamanda da otandy súıý ǵoı. Biraq endi ol ınnovatsııalyq sıpatta bolýy shart! Mine osy jerde Elbasynyń «Máńgilik el» ıdeıasynyń atqaratyn roli zor. Bul ıdeıa - otansúıgishtikti, salt-dástúrdi jáne ınnovatsııany úılestiretin biregeı formýla. Bir qaraǵanda jahandaný ulttyq ıdeıadan bas tartý sııaqty bolyp kórinedi. Biraq odan qorqýdyń qajeti joq. Sen óz ultyńnyń, elińniń patrıoty bolǵan saıyn, jahandaný úderisterine erkin qosyla alasyń. Óıtkeni sen ózińe, ózińniń ulttyq ereksheligińe senimdisiń, Sen odan aırylyp qalmaısyń. Sol úshin jahandaný úderisterin jaqsy qabyldaısyń.

- Aldaǵy sessııadan ne kútesiz?

- Menińshe, HHІ sessııa erekshe bir kezeńde óteıin dep otyr. Qazir álem tyǵyryqqa tireldi. Daǵdarystar kóbeıdi. Ne isteý kerek? Qandaı zańdar qabyldaý qajet? Barlyq zańdar qabyldanyp qoıylǵan. Naryqtyq, partııalyq barlyq mehanızmder bar. Al endi alǵa jyljý úshin, adamnyń ishki rýhanı álemin qamtýymyz kerek! Sony oıatýymyz qajet. Óıtkeni, myna daǵdarystardyń barlyǵy soǵystan emes, rýhanı mádenıettiń joqtyǵynan oryn alyp otyr. Qoǵamnyń bir bóligi jónsiz, qısynsyz baıysa, basqalar kedeılenýde.

Mine, Elbasynyń G-Global ıdeıasy osyndaı áleýmettik ádiletsizdikti, teńsizdikti jeńýge baǵyttalǵan. G-Global - bul álemniń sarapshylar qaýymdastyǵyna álem ekonomıkasy máseleleri jóninde ınteraktıvti, ashyq jáne buqaralyq pikirtalastar, pikirsaıystar júrgizýge jaǵdaı jasaıtyn kópfýnktsııaly platforma. Al aldaǵy sessııada rýhanı mádenıet máselesi kóterilip, adamnyń ishki rýhanı álemin qamtýǵa baǵyttalady degen úmittemin.