Jańa Qazaqstandy qurýǵa atsalysý – jastardyń da boryshy – Ádilgereı Zulharov

ORAL. QazAqparat – El Prezıdenti Qasym-Jomart Toqaevtyń Parlament Májilisiniń otyrysynda sóılegen sózine oraı jańa Qazaqstandy qurýǵa atsalysý – bizdiń de boryshymyz. BQO jastarmen jumys jónindegi resýrstyq ortalyǵynyń basshysy Ádilgereı Zulharov osylaı aıtty, dep habarlaıdy QazAqparat tilshisi.

Onyń aıtýynsha, búgin halyq arasynda qordalanyp qalǵan ózekti máseleler qozǵalyp, Úkimetke naqty tapsyrmalar júkteldi.

-Jastar ókili retinde Memleket basshysynyń «Jastar praktıkasy», «Alǵashqy jumys orny» jobalaryna ózgeris engizý qajet degen tapsyrmasyn jyly qabyldadyq, dedi ol.

Qos joba boıynsha jastardyń jumys isteý merzimi uzartylyp, jalaqy mólsherin kóbeıtý týraly tapsyrma berildi.

Endi Úkimet tez arada sheshim qabyldap, jastardy jobanyń jańa erejelerine sáıkes qyzmetke ornalasýyna qoldaý kórsetse, is nátıjesi arta túser edi.

Sondaı-aq jastardyń jańa bastamalaryna beriletin granttardyń quny 400 AEK-ke deıin ósetini qýantady. Bul áleýmettik osal toptaǵy jastardyń óz ıdeıalaryn iske asyrý jolyndaǵy zor múmkindik bolar edi.

«Sonymen qatar aldaǵy ýaqytta álemniń 5 joǵary oqý ornynyń fılıaldaryn Qazaqstanda ashý múmkindigi qarastyrylatyny jastardyń bolashaǵyna dańǵyl jol ashady. Sebebi bilim alý úshin muhıt asyp, shetelge shyǵýdyń qajettiligi azaıady. Óz Otanymyzda oqyp, týǵan jerdiń damýyna úlken úles qosý múmkindigi arta túspek. Osy oraıda Prezıdent tarapynan aıtylǵan usynystar men alǵa qoıylǵan tapsyrmalardyń tolyǵymen oryndalýy úshin ár maman, sonyń ishinde jastar óz deńgeıinde eńbek etse, Qazaqstanymyzdyń jańaryp, damıtyny anyq», dep túıindedi sózin Á.Zulharov.