Jańa Qazaqstan qundylyqtaryn kórsetetin balalarǵa arnalǵan kitapshalar shyqty
«Qazaqstandy birge salaıyq» boıamaqtary balalarǵa jaqsy qasıetterdi oıyn túrinde sińirýge baǵyttalǵan.
«Biz adam boıyndaǵy eń jaqsy qasıetterdi tańdap, olardy basty keıipkerler – Arman men Dıananyń kómegimen kitapshalarymyzdaǵy balalar sýretterinde kórsettik. 18 ıllıýstratsııa - bul jańa Qazaqstannyń bolashaq qurylysshylaryna boıaýǵa usynylǵan 18 sıýjet», - delingen baspasóz baıanynda.
«Qazaqstandy birge salaıyq» boıamaǵynyń tusaýkeseri 28 qańtar kúni astanadaǵy «Han Shatyr» saýda, oıyn-saýyq ortalyǵynda ótti. Oǵan qatysqan «Ómirlik qıyn jaǵdaıǵa tap bolǵan balalardy qoldaý ortalyǵy» KMM-niń 4-12 jas aralyǵyndaǵy balalar kitapshalardy alǵashqy bolyp kórip, olardy alǵashqy bolyp boıap kórdi.
«Prezıdent Toqaev:»Bizdiń dana halqymyzda «El bolamyn deseń, besigińdi túze» degen maqal bar. Sondyqtan mektepke deıingi tárbıe salasy basymdyqta bolýy kerek», - dep aıtqan bolatyn. Biz balalarǵa arnalǵan jaı ǵana boıaý kitapshasyn daıyndaǵan joqpyz. Ondaǵy árbir sýret balalardyń naǵyz qazaqstandyq bolyp ósýine kómektesetin adamı qasıetter men qundylyqtardy sıpattaıdy. Balalar sýretterdi boıaı otyryp, sol qundylyqty boıyna sińirip otyrady. Sonymen qatar bul ata-analar úshin balalarymen mańyzdy dúnıe – elimizdiń bolashaǵy týraly sóılesýge sebep bola alady», - deıdi «Jańa Adamdar» belsendisi Mıras Ahmetov.
Foto uıymdastyrýshylarmen usynyldy