Jańa Qazaqstan barlyq qyrynan «Taza Qazaqstan» bolýy kerek
«Saıası uıymnyń ataýyn Amanat dep ózgertý usynyldy. Jasyratyn eshteńe joq, men de bul máselege baılanysty pikirtalasqa qatystym. Birneshe usynys boldy, sonyń ishinen Amanat degen ataýǵa toqtadyq. Bul – elimiz úshin de, ultymyz úshin de aıryqsha máni bar kıeli uǵym. Egemendigimiz, eldigimiz ben birligimiz, keń baıtaq jerimiz – bizge babalardan jetken amanat. Osy qasterli qundylyqtarymyzdy kózdiń qarashyǵyndaı saqtap, bolashaqqa mıras etýimiz kerek. Memlekettilik dástúr jalǵastyǵy, urpaq sabaqtastyǵy degenimiz – mine osy. Halqymyz eshqashan amanatqa qııanat jasamaǵan. Partııa bul qaǵıdatty berik ustanady», - dedi Memleket basshysy.
Qasym-Jomart Toqaev «Amanat» ata-babalarymyzdyń keleshek urpaqqa qaldyrǵan ósıeti degen uǵymdy bildiretinin, Amanat sóziniń – maǵynasy tereń, halqymyzdyń tarıhy men mádenıetinde erekshe oryn alatynyn atap ótti. Ol babalarymyz ósıet etken táýelsizdiktiń máńgi arman-muraty, qýatty memlekettiliktiń jáne jalpyulttyq tutastyqtyń, keń-baıtaq Otanymyzdyń qundylyǵy retinde sıpattalady.
«Biz osy baǵa jetpes muramyzdy saqtap, nyǵaıtýǵa tıispiz. Bul – bizdiń aǵa býyn men óskeleń urpaq aldyndaǵy qasterli boryshymyz. Sondyqtan men partııamyzdy resmı túrde Amanat dep ataýdy tolyq qoldaımyn», - dedi Prezıdent.
Memleket basshysy ótken aıda júrgizilgen aýqymdy analıtıkalyq jumystar partııa qyzmetine mańyzdy ózgerister engizý qajet ekenin kórsetti dep atap ótti. Joǵaryda aıtylǵan usynystardy qoldaı otyryp, partııa Tóraǵasy birqatar basym mindetti aıqyndap berdi. Onyń pikirinshe, eń aldymen, ortalyqqa táýeldilikti joıý jáne partııa apparatynyń tıimdiligin arttyrý qajet.
«Endi bilek sybana jumys jasaýymyz kerek. Halyq naqty ózgeristerdi kútip otyr. Partııa atyna zaty saı bolýy tıis. El birligin nyǵaıtyp, Jańa Qazaqstandy qurý - bárimizge ortaq mindet. Osy mindetti abyroımen atqarsaq, bolashaǵymyz da baıandy bolmaq. Partııanyń árbir múshesi bul jaýapkershilikti tereń sezinip, aıanbaı eńbek etedi dep senemin. «Bereke basy - birlik« ekenin árdaıym este saqtaıyq! Jańa Qazaqstandy birge quraıyq! Elimiz aman, jurtymyz tynysh bolsyn!» - dedi Memleket basshysy partııanyń kezekten tys sezinde.
Jańa baǵyt, jańa jol tańdaldy
Senator Nurtóre Júsip partııanyń ataýy ózgergenin, endi onyń qurylymy da, sapalyq ólshemi de ózgerýi tıis ekenin basa aıtady.
«Men úshin eń basty qundylyq – Qazaqstannyń Táýelsizdigi. Memleket basshysy retinde elimizdiń qaýipsizdigi men halqymyzdyń amandyǵyn qamtamasyz etý úshin qoldan kelgenniń bárin jasaımyn. Jaýapkershilik júgi qanshama aýyr bolsa da, odan esh qaımyqpaımyn», - degen Toqaevtyń sózinen bastalǵan reformalardyń barlyǵy júıel túrde jalǵasatynyn ańǵarýǵa bolady. Jón sózge toqtaǵan jurtpyz. Ulaǵatty tárbıe kórgen ultpyz. Bir nárseni anyq uǵynǵan abzal. Bizge qýatty da ál-aýqatty Qazaqstandy eshkim quryp bermeıdi. Bárin ózimiz isteýimiz qajet. Osyny qaperde ustaıyqshy», - dedi N. Júsip.
Senat depýtaty Baqytjan Jumaǵulov QR Prezıdenti Qasym-Jomart Toqaev saılaýaldy baǵdarlamasynda aıtylǵan ekonomıkalyq jáne saıası reformalardy odan ári jalǵastyryp kele jatqanyn atap ótti.
«Osylaısha «Halyq únine qulaq asatyn memleket» kontseptsııasy jasaldy. Odan keıin jańa Qazaqstan joly tańdaldy. Bul ne? Qandaı baǵyt? Bul jaıly sońǵy jyldary ekonomıkada saıası reforma turǵysynda jasalǵan alǵashqy qadamdardy aıtsaq ta jetkilikti. Aýyl ákimderiniń saılaýy ótti, saıası partııalardyń rólin kóterýge baǵyttalǵan zańnamalyq qadamdar da jasaldy. Endi aýdan ákimderi saılanatyn bolady. Kóleńkeli ekonomıkamen kúres, korrýptsııany quryqtaý, ádil qoǵam qurý maqsaty da qoıyldy. Mine, osy jolda Memleket basshysy jańa baǵyt, jańa jol tańdady. Aldaǵy ýaqytta jarııa etiletin Jańa Qazaqstannyń jańa jolyn halyq asyǵa kútedi», - dedi ol.
Sondaı-aq senator bılik partııasynyń kezekten tys sezinde uıym ataýyn «Amanat» dep ózgertýge qatysty oıymen bólisti. «Endi partııanyń aty «Amanat» dep ózgertildi. Bul sózdiń astary men mazmuny tereń. Amanat - halyq senimi, qoǵam tiregi, jaýapkershilik pen ádilettilik kepili. Endi partııanyń aty ǵana ózgerip qoımaı, onyń jumys isteý tásilderi de jańǵyrady. Partııa men halyqtyń birligi artady. Ol qoǵamdyq ózgeristerdiń, bolashaqta júrgiziletin barlyq júıelik ózgeristerdiń basynda turatyn jańa partııa bolmaq», -dedi B. Jumaǵaulov.
Sonymen qatar, «Amanat» partııasynyń Taldyqorǵan qalalyq fılıaly tóraǵasynyń birinshi orynbasary, depýtat Amanjol Jazyqbaevtyń paıymynsha, Prezıdenttiń qoıǵan mindetterin oıdaǵydaı júzege asyrý úshin jaýapkershilik pen talapqa saı kadrlar qajet.
«Partııa Tóraǵasynyń qoıǵan mindetterin oıdaǵydaı júzege asyrý úshin jaýapkershilik pen talapqa saı kadrlar qajet. Osylaısha, uıym jergilikti jerlerde partııa qataryn nyǵaıtý jumysyna kirisedi. Resmı derekterge súıensek, «Nur Otan» partııasynyń negizin quraıtyn 4,5 myńnan astam bastaýysh partııa uıymy (BPU) bar. Partııa músheleriniń biliktiligin arttyrý, BPU jetekshileriniń reıtıngin engizý jáne partııa jarnasynyń 20 paıyzyn qaıtarý arqyly BPU-ny nyǵaıtý josparlanýda. Partııa janyndaǵy Saıası menedjment mektebi 3 myńnan astam partııa múshesin saıası menedjment pen kommýnıkatsııanyń jańa formattary boıynsha oqytatyn bolady. Jarnanyń 20 paıyzyn qaıtarý týraly aıtqanda, bul qarjynyń partııalyq jobalardy júzege asyrýǵa jumsalatynyn erekshe atap ótken jón. Belgili bolǵandaı, partııalyq jobalar birinshi kezekte aǵa urpaqty, jastardy jáne kómekke muqtaj adamdardy qamtıdy. BPU-nyń jumysy keńeıip, tıimdi quraldary arqyly júzege asyrylad»,- dedi A. Jazyqbaev.
Munymen qosa, akter, Temirbek Júrgenov atyndaǵy Qazaq ulttyq óner akademııasynyń rektory Azamat Satybaldy Nur Otan partııasynyń AMANAT bolyp ózgerýi men partııaǵa júktelgen mindetter týraly pikir bildirdi.
Onyń pikirinshe Jańa Qazaqstandy qurý - Qazaqstan halqynyń ortaq mindet. Qańtar aıynyń basynda Qazaqstan tap bolǵan oqıǵalar elimizdiń tutastyǵy men táýelsizdigine qaýip tóndirgen kúrdeli kezeń boldy.
«Osy ýaqytta Prezıdenttiń tıimdi sheshimder qabyldap, jaǵdaıdy turaqtandyra alǵanynyń kýási boldyq. Memleket basshysy Jańa Qazaqstan quratynymyzdy aıtty. Onyń baǵyt- baǵdaryn kórsetti. Aıtylǵan oı aıqyn, tapsyrmalar naqty bolǵandyqtan, olardyń abyroımen oryndalatynyna senimdimiz. Jalpy, bul sharýany iske asyrý – búkil Qazaqstan halqynyń ortaq mindeti dep esepteımin»,- deıdi Qazaq ulttyq óner akademııasynyń rektory.
Atap aıtqanda, QR Parlament Senaty tóraǵasynyń orynbasary Asqar Shákirov Qazaqstan halqyna bıylǵy naýryzdaǵy Joldaýynda Prezıdent jańa qoǵam qurýdyń jan-jaqty sheshimin usynatynyn jetkizdi.
«Júrgizilip jatqan aýqymdy reformalardyń negizi retinde myqty zańnamalyq baza qalyptastyrý qajet. Biz, Parlament depýtattary, tıisinshe, osy mindetti jedel iske asyrý úshin sapaly zańdar qabyldaý jónindegi óz qyzmetimizge odan ári qarqyn berýge tıispiz. Memleket basshysy óziniń jańǵyrtý jónindegi kún tártibiniń mańyzdy baǵyty retinde daryndy, bilikti adamdarǵa, óz halqy men eliniń shynaıy patrıottaryna jol ashýy tıis qaǵıdatty jańa kadr saıasatyn aıqyndady. Men memleket basqarýǵa qoǵamnyń neǵurlym aýqymdy toptaryn zańnamalyq deńgeıde tartý jóninde atap óttim. Kelesi kezekte jergilikti ózin-ózi basqarý ınstıtýtyn kezeń-kezeńimen nyǵaıtý protsesi tur», - dedi A. Shákirov.
Al Aqylbek Kúrishbaevtyń aıtýynsha, elimizde kúrdeli saıası, ekonomıkalyq ózgerister bastaldy.
«Jańa Qazaqstandy, buıyrsa, quramyz, Bizde ádiletti qoǵam bolady. Biraq sonyń bárin retpen keltirýimiz kerek, Evolıýtsııalyq jolmen, aqylmen isteý qajet. Áleýmettik jelini ashyp qalsań, neshe túrli pikirler bar. Qazir qyryq pyshaq bolyp jatyrmyz. Blogerler sondaı ortada pikir qalyptastyryp jatyr. Álemde neshe túrli qorlardan aqsha alatyn blogerler bar», - degen Senat depýtaty Jańa Qazaqstan ekonomıkany olgarhııalyq júıeniń yqpalynan azat etkende ǵana qurylatynyn atady.
«Olıgarhtardyń ekonomıkasyn qurtamyz, ádiletti Qazaqstan qalyptastyramyz dep jatyrmyz. Saraptamalyq málimet boıynsha, bizdiń ekonomıkamyzdyń 55 protsenti 162 otbasyǵa tıesili eken. Prezıdent osyndaı olıgapolııaǵa jol berilmeıtinin, orta jáne shaǵyn bıznesti damytýǵa basymdyq beriletinin aıtty. Árıne, ashyǵyn aıtsaq, ondaı ustanym álgi baılarǵa unamaıdy. Jınaǵan baılyǵyn ońaılyqpen bere salǵysy kelmeıdi. Solardyń qolshoqparlary paıda boldy. Ony da jastar bilýi kerek. Olar qazir úgittep, aramyzǵa iritki salyp, ótirik áńgimelermen resmı bılikke, reformalarǵa qarsy shyǵyp jatyr. Osy dúnıeniń bárin oılanyp júrý kerek», - dedi senator.