Jańa qaýly: Jambyl oblysynda karantındik shekteýler kezeń-kezeńmen jeńildetiledi
Oblystyń Bas memlekettik sanıtarııalyq dárigeriniń 2021 jylǵy 25 mamyrdaǵy «Karantındik shekteý sharalary jáne olardy kezeń-kezeńimen jeńildetý týraly» №5 qaýlysyna sáıkes Taraz qalasyn qospaǵanda, oblys aýmaǵyndaǵy áleýmettik-ekonomıkalyq obektilerdiń qyzmetin shekteý «Jasyl» aımaq ólshemsharttary negizinde qabyldanatyn bolady.
Atap aıtqanda, ónerkásip, qurylys, aýyl jáne balyq, mal sharýashylyǵy nysandary, baılanys qyzmetteri, týrıstik kompanııalar, bıznes ortalyqtary, gúl dúkenderi, fotosalondar, ýzeıler, kitaphanalar, azyq-túlik dúkenderi, shaǵyn marketterdiń jumysyna tolyq ruqsat berildi.
Sol sekildi strıt-fýd, monshalar, ashyq aýadaǵy attraktsıondar, sýpermarketter, gıpermarketter, medıtsınalyq uıymdar, dárihanalardyń da qyzmetine ruqsat etilgen.
Al, túngi jáne oıyn klýbtary, karaoke-barlardyń jumysyna shekteý saqtalady jáne oıyn-saýyq, buqaralyq is-sharalar, konferentsııalar, forýmdar, otbasylyq, estelik is-sharalar ótkizýge tyıym salynǵan.
Eskeretin jaǵdaı, jańa qaýlyda uıymdar, ofıster qyzmetkerlerin COVID-19-ǵa qarsy vaktsınatsııalaý júrgizilgen jaǵdaıda qyzmetin qashyqtyqtan jáne kúndizgi jumys formatynda jumys isteıtin qyzmetkerlerdiń paıyzdyq ara qatynasy jónindegi talaptardy eskermeı júzege asyrady. Bul rette sońǵy 6 aı ishinde COVID-19 ǵa qarsy vaktsınatsııalaýdyń tolyq kýrsyn alǵan jáne COVID-19 men aýyryp jazylǵan barlyq qyzmetkerlerdiń kúndizgi rejımde jumys isteýine ruqsat beriledi.
Atalǵan qaýly 2021 jylǵy 27 mamyrda saǵat 00:00-de kúshine enetin bolady.