Jańa qaýly: «Qyzyl» aımaqtaǵy mektepterde ǵana maska rejımi mindetteledi

NUR-SULTAN. QazAqparat – QR Bas sanıtar dárigeriniń jańa qaýlysy boıynsha, epıdemıologııalyq jaǵdaıdy baǵalaý matrıtsasyndaǵy «jasyl» jáne «sary» aımaqtaǵy óńirlerdiń bilim berý uıymdaryna kabınettik oqytý júıesine kóshýge ruqsat berildi, dep habarlaıdy QazAqparat tilshisi.

«Epıdemıologııalyq jaǵdaıdy baǵalaý matrıtsasyna sáıkes «jasyl» jáne «sary» aımaqtarda ornalasqan óńirlerde barlyq menshik nysanyndaǵy jáne vedomstvolyq tıisti bilim berý uıymdarynda:

1) kabınettik oqytý júıesin boldyrmaýǵa;

2) maska kııý rejımin mindetti túrde saqtaýǵa qoıylatyn talaptar alynyp tastalsyn», - delingen qaýlyda.

Alaıda, bul «jasyl» jáne «sary» aımaqtaǵy bilim uıymdarynda maska rejımi múlde alynyp tastalady degen sóz emes. Maska rejıminiń qajettigi týraly sheshimdi uıymnyń basshylyǵy qabyldaýǵa quqyly.

«Maska kııý rejımin saqtaý bilim berý uıymdary ákimshiliginiń sheshimi boıynsha erikti túrde júzege asyrylýy múmkin», - dep jazylǵan.

Al óńir epıdemıologııalyq jaǵdaıdy baǵalaý matrıtsasy boıynsha «qyzyl» aımaqqa aýysqan kezde barlyq menshik nysanyndaǵy bilim berý uıymdarynda maska kııý rejımi qaıta engizilip, kabınettik oqytý júıesine tyıym salynady. Tek zerthanalyq, praktıkalyq sabaqtardy ǵana kbaınettik júıede oqytýǵa bolady.

Qaýly qol qoıylǵan kúnnen bastap kúshine engen. Tolyq mátinin myna jerden kórýge bolady.