Jańa qaýly: Qaraǵandy oblysynda merekelik is-sharalardy ótkizýge tyıym salyndy

QARAǴANDY. QazAqparat – Qaraǵandy oblysynyń aýmaǵynda koronavırýstyq ınfektsııanyń taralýyna baılanysty «Ashyq» pılottyq jobasy iske asyrylyp jatqan nysandardy qospaǵanda, qyzmeti jańartylmaǵan nysandarǵa: karaoke, túngi klýbtar, býkmekerlik keńseler, kompıýterlik klýbtar, boýlıng-ortalyqtarǵa barýǵa tyıym salynady, dep habarlaıdy QazAqparat.

Sonymen qatar olardyń jumys rejımine sáıkes jabylǵannan keıin nysandarda bolýǵa tyıym salynady.

«Ashyq» jobasyna qatysatyn Qaraǵandy oblysynyń áleýmettik-ekonomıkalyq nysandary oblystyń «qyzyl aımaqta» bolýyna qaramastan, «sary aımaqtaǵy» talaptarǵa sáıkes jumys isteıdi. Bul týraly sanıtarlyq-epıdemıologııalyq baqylaý departamentinen habarlandy.

Budan basqa, halyqtyń buqaralyq, oıyn-saýyq, otbasylyq jáne estelik is-sharalaryna (onyń ishinde «aýyz ashar», Pashaǵa arnalǵan merekelik is-sharalar, eske alý jáne t.b.) barýyna tyıym salyndy. Sondaı-aq, departament mamandary «Ata-analar kúni» arnalǵan zırattarǵa barǵanda sanıtarlyq erejelerdi saqaý kerektigin eske saldy.

«Qaraǵandy oblysynyń bas memlekettik sanıtarlyq dárigeriniń qoldanystaǵy qaýlysynyń talaptaryna sáıkes, karantın kezeńinde jumysy jalǵasatyn uıymdar men kásiporyndardyń qyzmet túrleriniń tizbesine zırattardyń qyzmeti kiredi. Qaýlynyń 3-tarmaǵynyń 5-tarmaqshasyna sáıkes «Ata-analar kúninde» bir otbasy múshelerin qospaǵanda, 3 adamnan aspaıtyn toptarmen betperde rejımin, áleýmettik qashyqtyqty saqtaı otyryp, zırattarǵa barýǵa bolady», - dep túsindirdi vedomstvodaǵylar.

Sondaı-aq balalar arasynda KVI aýrýy tirkelýiniń ósýine baılanysty Qaraǵandy, Temirtaý, Saran, Shahtınsk, Balqash, Prıozersk, Jezqazǵan, Sátbaev qalalarynda jáne Abaı, Nura, Osakarov aýdandarynda jalpy bilim beretin mektepaldy synyptarynyń 1-5 synyp oqýshylary, 1-7 synyp aralyǵyndaǵy halyqaralyq mektepterde koronavırýs ınfektsııasynyń odan ári taralýyna jol bermeý maqsatynda qashyqtan oqytý formatyna kóshedi.

Bul rette, sabaqtan tys ýaqytta toptarda oqýshylardy jeke oqytý kezinde balalar sany 15-ten 10 adamǵa deıin tómendedi, al kórsetilgen qalalar men aýdandarda áleýmettik qashyqtyqty, shahmattyq retpen otyrǵyzýdy jáne betperde rejımin mindetti túrde saqtaı otyryp, toptardaǵy balalar sanyn 5 adamnan asyrmaý kerek. Oblystyń basqa óńirlerinde oqytý burynǵy formatta jalǵasatyn bolady.

Qaýly qol qoıylǵan sátten bastap kúshine enedi.