Jańa ınvestor «ArselorMıttal Temirtaýǵa» qansha qarajat salady

<p>QR Ónerkásip jáne qurylys mınıstri Qanat Sharlapaev «ArselorMıttal Temirtaý» kompanııasynyń jańa ınvestory qandaı mindettemelerdi óz jaýapkershiligine alǵanyn aıtyp berdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Úsh jylda bul kásiporynǵa ınvestıtsııanyń jalpy kólemi shamamen 3,5 mlrd dollarǵa jetedi jáne jaqyn arada kásiporynnyń operatsııalyq jumysyn jaqsartý úshin 1 mlrd dollardan astam ınvestıtsııa salynady», — dedi Qanat Sharlapaev Úkimette ótken brıfıngte.

Sonymen birge, mınıstr jańa ınvestormen ınvestıtsııalyq kelisim sheńberinde tikeleı kásiporynnyń ózine ınvestıtsııalar boıynsha mindettemeler kózdelgenin aıtty.

«Birqatar áleýmettik mindettemeler qarastyrylǵan jáne bul jumys Qaraǵandy oblysynyń basshylyǵymen jáne Temirtaýdyń jergilikti atqarýshy organdarymen birlesip júrgizildi. „ArselorMıttal Temirtaýdyń“ qyzmetkerler aldyndaǵy, jetkizýshiler aldyndaǵy búkil mindettemeleri tolyq kólemde oryndalady. Biz bul kásiporynnyń jumysyn qyzmetkerler aldyndaǵy áleýmettik mindettemede esh ózgeris bolmaıtyndaı qoldaımyz», — dep tolyqtyrdy Qanat Sharlapaev.

Aıta keteıik, búgin «ArselorMıttal Temirtaýdyń» jańa ınvestory anyqtaldy. Jańa ınvestor — qazaqstandyq bıznesmen Andreı Lavrentev.

Ol 1979 jyly Almaty qalasynda dúnıege kelgen.

«Allur Group» kompanııalar toby dırektorlar keńesiniń tóraǵasy, onyń quramynda «Agromashholdıng» jáne «SaryarqaAvtoProm» JShS bar.

Kompanııalar toby Chevrolet, KIA, JAC jáne LADA avtobrendteriniń Qazaqstan aýmaǵyndaǵy resmı óndirýshisi jáne dıstrıbıýtory.

Sondaı-aq, «ArselorMıttal Temirtaý» resmı túrde QARMET bolyp ózgerdi.