Jańa HQO almatylyqtarǵa bir aptada 2 myńǵa jýyq qyzmet kórsetti

ALMATY. QazAqparat – Almatyda taǵy bir Halyqqa qyzmet kórsetý ortalyǵy ashyldy, dep habarlaıdy QazAqparat tilshisi.

«Azamattarǵa arnalǵan úkimet» memlekettik korporatsııasy bul ortalyqty megapolıstegi halyqqa qyzmet kórsetý ortalyqtardyń júktemesin azaıtyp, qyzmet alýshylarǵa yńǵaıly jaǵdaı jasaý maqsatynda ótken aptada ashqan bolatyn.
Halyq tyǵyz ornalasqan aýdanda ornalasqan jańa ortalyq búginde óz tıimdiligin dáleldep, qala turǵyndaryna qyzmetterdi yńǵaıly ortada jáne tez alýǵa múmkindik berip otyr. Іske qosylǵanyna bir apta ǵana ýaqyt bolǵan ortalyq qyzmetkerleri almatylyqtarǵa 1900 qyzmet kórsetip úlgerdi. Onyń basym bóligi elektrondy túrde kórsetildi.
«Jańa ǵımarat kólik qatynasyna yńǵaıly jerde ornalasqan. Júrgizýshiler úshin 30 oryndyq turaq ta qarastyrylǵan. Jalpy ortalyqta 18 qujat qabyldaý orny, 4 mıgratsııalyq polıtsııa qyzmetkerlerine arnalǵan ústel, qyzmet alýshylarǵa arnalǵan 75 oryndyq kútý zaly bar. Sońǵy zamanaýı úlgide ellıps formasynda jasalǵan «Connection point» óz-ózine qyzmet kórsetý aýmaǵynda ortalyqtyń keńesshi mamandary kez kelgen baǵytta úzdiksiz kómek kórsete alady. Jumys kúnderi bul jerde ortasha eseppen 1500 adam qyzmet alady. Jańa HQO Baızaqov kóshesi, 174 ǵımaratta ornalasqan», - dep málim etti «Azamattarǵa arnalǵan úkimet» memlekettik korporatsııasy Almaty bólimshesiniń baspasóz qyzmeti.
Aıta keteıik, «Azamattarǵa arnalǵan úkimet» memlekettik korporatsııasy jyl basynan beri 9 front-ofısti iske qosty. Almaty, Shymkent, Almaty oblysynda 3 mamandandyrylǵan HQO, ShQO, Qyzylorda, Pavlodar, Túrkistan oblystary 4 mıgratsııalyq qyzmetter ortalyǵy, Almaty qalasynda 2 HQO ashyldy.