Jańa ereje: Almatyda qurylysqa qatań shekteýler engizildi
Bul erejeler tyǵyz qurylysqa, taý bókterleriniń, jasyl aımaqtar men aýlalardyń ıgerilýine jol bermeý maqsatynda ákimdik tarapynan ázirlengen. Buǵan deıin qujat sarapshylarmen jáne jurtshylyqpen keńinen talqylanǵan bolatyn.
Máslıhat depýtattarynyń aldynda sóz sóılegen Qalalyq josparlaý jáne ýrbanıstıka basqarmasynyń basshysy Nurlan Boranbaev jańa erejeler qurylysqa qatań shekteýler engizýdi, kóppáterli turǵyn úılerdi qabyldaýda memlekettik organdardyń baqylaýyn kúsheıtýdi, sondaı-aq sáýlet-qurylys baqylaý organdarynyń fýnktsııalaryn keńeıtýdi qarastyratynyn atap ótti.
Jańa erejeler qandaı shekteýlerdi kózdeıdi?
Abaı dańǵyly men ál-Farabı dańǵyly arasyndaǵy qurylysqa bıiktik shekteýi belgilendi: barlyq úlgidegi ǵımarattardyń bıiktigi 9 qabattan jáne 35 metrden aspaýǵa tıis.
Erekshelik tek qoǵamdyq mańyzy bar, sáýlet-ýrbanıstıkalyq negizdemesi bar, jobalyq sheshimderdiń ornyqtylyǵy men ekologııalyq talaptarǵa saı, energııa únemdeý jáne resýrs únemdeý tehnologııalaryn qoldaný arqyly salynatyn biregeı nysandarǵa ǵana jasalady.
Sondaı-aq, jańa erejeler seısmıkalyq qaýipti aımaqtar men taý bókterlerindegi Shyǵys aınalma avtomobıl joly, ál-Farabı dańǵyly, Saın men Jandosov kósheleriniń ońtústigindegi qurylys tártibin retteıdi:
— Taý bókterindegi, sonyń ishinde eńis buryshy 15 gradýstan asatyn aýmaqtarda qurylys salýǵa tyıym salynady;
— Buryn qabyldanǵan ǵımarattardyń bıiktigi 12 metrden jáne 3 qabattan aspaýǵa tıis degen sheshim bekitildi (qoǵamdyq-mádenı nysandardan basqa);
— Qaıta qurý kezinde terrasalar men tehnıkalyq qabattardy qaıta jabdyqtaýǵa tyıym salynady.
Buǵan qosa, qalanyń barlyq aýmaǵynda III sanattan tómen emes turǵyn úı salý talaby bekitiledi jáne ár páterge keminde 1 avtoturaq ornyn qarastyrý qajet.
Tyǵyz qurylysqa jol bermeý jáne rekreatsııalyq aımaqtardy saqtaý jónindegi sharalar
— Almatyda turǵyn kvartaldar men aýlalarda núkteli qurylystyń salyný máselesi ózekti bolyp otyr. Buryn zańnamalyq turǵyda jasyl aımaqtar men aýladaǵy balalar alańshalarynda qurylys salýǵa tyıym bolmaǵan jaǵdaıda, jańa erejelerde mundaı qurylysqa qatań tyıym salynady. Sonymen qatar, qalanyń ortalyq magıstraldarynda, áleýmettik nysandar men adamdar kóp jınalatyn oryndardyń mańynda janarmaı quıý beketteri men tehnıkalyq qyzmet kórsetý ortalyqtaryn salýǵa bolmaıdy.Tabıǵı qorlardy jáne aýlalyq rekreatsııalyq aımaqtardy saqtaý maqsatynda qurylys aýmaǵyn keńeıtý úshin tabıǵı landshaftty ózgertýge, taý bókterlerindegi jyralar men jylǵalardy jabýǵa, taý bókterin kesýge tyıym salynady, — delingen jańa erejede.
Osyǵan deıin, Almatyda 12 qabattan joǵary qurylysqa tyıym salynýy múmkin ekeni týraly jazǵan edik.