Jańa Eńbek kodeksi eńbek qatynastaryn retteýdiń jańa modelin qalyptastyratyn bolady - T. Dúısenova
Jańa redaktsııadaǵy kodeks jobasy bes ınstıtýtsıonaldyq reformany iske asyrýǵa baǵyttalady. Sonymen qatar, qujat eńbek qatynastaryn retteýdiń jańa modelin qamtyp, ol Halyqaralyq eńbek uıymynyń, Ekonomıkalyq ynytmaqtastyq jáne damý uıymynyń eńbek standarttaryna negizdelgen.
«Jańa Eńbek kodeksi eńbek qatynastary salasynda jumys berýshi men qyzmetkerler arasynda memlekettik aralasý shegin aıqyndaýdy, eńbek qatynastary sýbektileriniń róli men jaýapkershiligin jikteýdi usynady. Memleket óz tarapynan eńbekaqylar men ótemaqylardyń eń tómengi eńbek standarttaryn ornatyp, jumys berýshiler tarapynan olardyń oryndalýyna baqylaý júrgizedi. Bul rette eń tómengi áleýmettik standarttar árbir azamattyń eńbek bostandyǵyna, qaýipsizdik jáne gıgıena talaptaryna saı eńbek jaǵdaıyna, eńbekke qandaı da bir kemsitýshiliksiz ótemaqy alýyna qamtamasyz etedi», - dedi Densaýlyq saqtaý jáne áleýmettik damý mınıstri Tamara Dúısenova.
Onyń aıtýynsha, kodeks jobasynda bir jaǵynan jumys berýshiler úshin belgili bir kólemde jumysqa jaldaý, kadrlyq jyljý, jumystan bosatý, qyzmetkerleriniń eńbek jaǵdaılary men eńbegine aqy tóleý rásimderi jeńildetilgen. Ekinshi jaǵynan qyzmetkerlerdiń bazalyq eńbek múmkindikteri men quqyqtary belgilenip, jeke ujymdyq sharttar men kelisimder arqyly keńeıtý kózdeledi. Osylaısha, óz dárejesinde damymaı kelgen kelisimder men ujymdyq sharttar rólin kóterý qarastyrylady.
Tutastaı alǵanda, kodeks jobasy kásipkerlikti, eńbek naryǵyn damytýdy, sheteldik ınvestorlar tartýdy belsendire túspek. Budan basqa, múgedekterdi, jastardy, otbasylyq mindetteri bar adamdardy qosa alǵanda, jumyskerlerdiń jekelegen sanattary úshin jumys oryndaryn qurýǵa yntalandyrýǵa baǵyttalǵan birqatar sharalar da qamtylady. Jalpy, kodeks jobasynda áleýmettik qorǵaý, ádilettilik, ekinshi jaǵynan, ekonomıkalyq tıimdilik arasyndaǵy ońtaıly tepe-teńdikti úılestirýdi saqtaý kózdeledi.