Jańa bosanǵan 63 myń ana sábıiniń alǵashqy qujatyn proaktıv ádisimen aldy

ASTANA. QazAqparat - «Azamattarǵa arnalǵan úkimet» memlekettik korporatsııasy 2017 jyldyń jeltoqsanynda úsh memlekettik qyzmetti bir ǵana sms habarlamanyń kómegimen alýǵa bolatyn proaktıv qaǵıdasyn engizgen bolatyn. Sodan beri bul qyzmetti 63 330 ana qoldandy, dep habarlaıdy QazAqparat korporatsııanyń baspasóz qyzmetine silteme jasap.

Bir jarym jyl ishindep jas bosanǵan júz myńnan astam anaǵa sms-quttyqtaý joldanyp, balanyń týý týraly kýáligin proaktıv tásilimen alý usynyldy. Onyń ishinde 63 330 ana memlekettik qyzmetke tapsyrys berip, sábıleriniń alǵashqy qujatyn onlaın ótinish arqyly aldy. Aıta keteıik, pılottyq joba sheńberinde náresteli bolǵan áıelder sms-habarlamaǵa jaýap berý arqyly balanyń týý týraly kýáligin rásimdep, járdemaqy alýǵa ótinish joldap, balany balabaqsha kezegine qoıa alady.

«Jas bosanǵan áıelderge halyqqa qyzmet kórsetý ortalyǵyna birneshe ret barýdyń qajeti joq. Buryn analar besigindegi balasyn qaldyryp, ne olardy qundaqtap HQO-ǵa kelip júretin. Tsıfrlandyrý zamanynda proaktıv ádisi arqyly barlyǵyn onlaın júzege asyrýǵa bolady. Ony paıdalaný úshin analar bosanbas buryn mobıldi azamattar bazasynda tirkelýi tıis», - deıdi memlekettik korporatsııanyń basqarma tóraǵasy Ablaıhan Ospanov.

Búginde proaktıv ádisi Telegram qosymshasyndaǵy arnaıy bot arqyly da qoljetimdi. Mobıldi bazaǵa tirkelgen azamatshalar uıaly telefonynyń kómegimen ózderi de joǵaryda atalǵan úsh qyzmetke tapsyrys bere alady. 2018 jyldyń qyrkúıeginde iske qosylǵan bot qyzmetine 5,5 myńǵa jýyq áıel júgingen, onyń ishinde 4 842 ana balalarynyń týý kýáligin rásimdegen.